ريم پاپاسى فرانتسيسكتىڭ جاعدايى اۋىر

استانا. KAZINFORM - ۆاتيكان دۇيسەنبى كۇنى ريم پاپاسى فرانتسيسكتىڭ جاعدايى اۋىر ەكەنىن جانە ەرتە بۇيرەك جەتىسپەۋشىلىگى انىقتالعانىن حابارلادى. 88 جاستاعى پونتيفيك باسقا دا اسقىنۋلارعا ۇلاسقان پنيەۆمونيامەن كۇرەسىپ جاتىر، دەپ جازادى Euronews.

ۆاتيكان مالىمدەمەسىندە فرانتسيسكتىڭ سەنبى كۇنگى كەشتەن بەرى تىنىس الۋ جولدارىندا الاڭدايتىنداي قاۋىپ بولماعانىمەن، ءالى دە كوپ مولشەردە وتتەگىن قابىلداپ جاتقانى ايتىلعان.

دارىگەرلەر اقپان ايىنىڭ ورتاسىندا اۋىرىپ قالعان پونتيفيكتىڭ ەمدەلۋ جولىن بىرنەشە رەت وزگەرتكەن. تەك وتكەن اپتانىڭ سوڭىنان بەرى عانا وڭ وزگەرىس بايقالعان. الايدا قاۋىپ ءالى جويىلعان جوق. ەڭ باستىسى، دارىگەرلەردىڭ ايتۋىنشا، سەپسيس، پنيەۆمونيادان كەيىنگى اسقىنۋ رەتىندە پايدا بولۋى مۇمكىن اۋىر قان ينفەكتسياسى. ونىڭ الدىن الۋ - بۇگىنگى كۇننىڭ ءبىرىنشى مىندەتى.

ارگەنتينادان ريمدەگى مەكتەپ وقۋشىلارىنا دەيىن پونتيفيكتىڭ اماندىعىن تىلەيدى.

بۇعان دەيىن حابارلانعانداي، ريم پاپاسى فرانتسيسككە ەكى جاقتى پنيەۆمونيا دياگنوزى قويىلعان بولاتىن.

الەم كاتوليكتەرى ريم پاپاسى فرانتسيسك ءۇشىن دۇعا ەتىپ جاتىر.