ريم پاپاسى: گازا سەكتورىنداعى جاعداي بارعان سايىن كۇردەلەنىپ بارادى

ۆاتيكان. KAZINFORM - ريم-كاتوليك شىركەۋىنىڭ جاڭا باسشىسى پاپا ليەۆ XIV گازا سەكتورىنداعى گۋمانيتارلىق احۋالعا الاڭداۋشىلىق ءبىلدىرىپ، اسكەري ارەكەتتەردى توقتاتىپ، ايماققا شۇعىل تۇردە گۋمانيتارلىق كومەكتى كىرگىزۋ قاجەتتىگىن اتاپ ءوتتى، دەپ جازدى انادولى اگەنتتىگى.

ريم-كاتوليك شىركەۋىنىڭ باسشىسى ەكسكلاۆقا گۋمانيتارلىق كومەكتى دەرەۋ جەتكىزۋدى قامتاماسىز ەتۋگە شاقىردى.

8-مامىر كۇنى كونكلاۆ شەشىمىمەن سايلانعاننان كەيىن العاش رەت جالپى قابىلداۋ بارىسىندا سويلەگەن پاپا ليەۆ XIV اۋليە پەتر الاڭىندا جينالعان جۇرتشىلىققا ۇندەۋ جاسادى.

- گازا سەكتورىنداعى جاعداي بارعان سايىن الاڭداتارلىق ءارى جان اۋىرتاتىن سيپاتقا يە بولىپ بارادى. مەن تاعى دا شىنايى ۇندەۋ جولداپ، گۋمانيتارلىق كومەكتىڭ ەش كەدەرگىسىز جەتۋىن جانە اسكەري قاقتىعىستاردىڭ توقتاتىلۋىن سۇرايمىن. سەبەبى بۇل ادام شوشىرلىق قاسىرەتتىڭ سالماعىن ەڭ الدىمەن بالالار، قارتتار مەن ناۋقاستار كوتەرىپ وتىر، - دەدى پونتيفيك.

پاپا ليەۆ XIV سونداي-اق بارشا ءدىندارلاردى كۇن سايىن بەيبىتشىلىك ءۇشىن جانە «جۇرەكتەردىڭ قارۋدان ارىلۋى» ءۇشىن دۇعا ەتۋگە شاقىردى.

گازا سەكتورىنداعى احۋال

18-ناۋرىز كۇنى يزرايل ارمياسى 19-قاڭتاردا ەنگىزىلگەن اتىستى توقتاتۋ مەرزىمى اياقتالعان سوڭ، گازاداعى شابۋىلدارىن قايتا كۇشەيتتى.

سول ۋاقىتتان بەرى 3427 پالەستينالىق قازا تاپتى، ولاردىڭ باسىم بولىگى - قارتتار، ايەلدەر جانە بالالار. تاعى 9647 ادام جاراقات الدى.

2023-جىلعى 7-قازاندا باستالعان جاپپاي شابۋىلداردان بەرى قازا تاپقانداردىڭ جالپى سانى 53573 ادامعا، ال جارالانعاندار سانى 121688 ادامعا جەتتى.

يزرايل ارمياسى گازادا وككۋپاتسيانى كەڭەيتىپ، بەكىتۋگە باعىتتالعان شابۋىل جوسپارىن ىسكە اسىرا باستادى. پرەمەر-مينيستر بينيامين نەتانياحۋ ەكسكلاۆتىڭ تولىقتاي وككۋپاتسيالاناتىنىن مالىمدەدى.

وسى جوسپارعا سايكەس، يزرايل اسكەرلەرى گازادا تۇراقتى باقىلاۋ ورناتىپ، پالەستينالىقتاردى ەكسكلاۆتىڭ وڭتۇستىگىندەگى ارنايى «كونتسەنتراتسيالىق لاگەرلەرگە» ءماجبۇرلى تۇردە كوشىرۋدى كوزدەپ وتىر. بۇل لاگەرلەردە تەك كۇن كورۋگە جەتەرلىك ەڭ از گۋمانيتارلىق كومەك كورسەتىلمەك.

يزرايل مينيسترلەرى گازا سەكتورىندا امان قالعان بارلىق ينفراقۇرىلىمدى جويۋ جانە پالەستينالىقتاردى - الدىمەن وڭتۇستىككە، كەيىن ەكسكلاۆ شەگىنەن تىس ەلدەرگە كۇشتەپ كوشىرۋ نيەتى بارىن مالىمدەدى.

يزرايل ۇكىمەتى اشتىقتىڭ الدىن الۋ ماقساتىندا گازاداعى ازىق-تۇلىك يمپورتىنا شەكتەۋلى رۇقسات بەرگەنىن حابارلادى. دەگەنمەن، ۋلتراوڭشىل كۇشتەردىڭ قارسىلىعىنا قاراماستان، دۇيسەنبى كۇنى ەكسكلاۆقا تەك بەس جۇك كولىگىمەن عانا گۋمانيتارلىق ازىق جەتكىزىلدى.