ريم پاپاسى العاشقى جەكسەنبىلىك ۋاعىزىن بەيبىتشىلىككە ارنادى
ۆاتيكان. KAZINFORM - پونتيفيك ۋكراينادا، تاياۋ شىعىستا جانە ءۇندىستان مەن پاكىستان اراسىنداعى جاعدايدى رەتتەۋگە شاقىردى، دەپ جازدى تاسس اگەنتتىگى.
ريم پاپاسى ليەۆ XIV ءوزىنىڭ العاشقى جەكسەنبىلىك ۋاعىزىن بەيبىتشىلىككە ارناپ، ەكىنشى دۇنيەجۇزىلىك سوعىستىڭ اياقتالعانىنا 80 جىل تولعانىن ەسكە سالدى جانە ۋكراينادا، تاياۋ شىعىستا، سونداي-اق ءۇندىستان مەن پاكىستان اراسىنداعى قاقتىعىستى رەتتەۋگە شاقىردى.
- ەكىنشى دۇنيەجۇزىلىك سوعىستىڭ قايعىلى كەزەڭى 80 جىل بۇرىن اياقتالدى. ول 60 ميلليون ادامنىڭ ءومىرىن قيدى. قازىرگى تاڭداعى ۇزىك-ۇزىك ءۇشىنشى دۇنيەجۇزىلىك سوعىس جاعدايىندا، بۇرىنعى پاپا فرانتسيسكتىڭ سوزىمەن ايتقاندا، مەن الەم كوشباسشىلارىن سوعىستى توقتاتۋعا شاقىرامىن، - دەدى 8-مامىردا سايلانعان پونتيفيك.
«ۋكراينادا ءادىل ءارى بەرىك بەيبىتشىلىكتىڭ مۇمكىندىگىنشە تەز ورناۋى ءۇشىن بارلىق قاجەتتى ارەكەتتەر جاسالسىن»، - دەپ اتاپ ءوتتى ليەۆ xiv. ءول وز ۇندەۋىندە «بەيبىتشىلىك» ءسوزىن 10 رەت قايتالادى. باقىلاۋشىلاردىڭ پايىمىنشا، تۇڭعىش امەريكالىق پاپانىڭ پونتيفيكاتى بەيبىتشىلىك پەن الەۋمەتتىك ادىلەتتىلىك ماسەلەلەرىنە باسىمدىق بەرەدى.
دۇيسەنبى كۇنى پونتيفيك ۆاتيكانداعى سوڭعى وقيعالاردى - پاپا فرانتسيسكتىڭ جەرلەۋ ءراسىمى مەن كونكلاۆتى - جاريالاعان جۋرناليستەرمەن العاشقى كەزدەسۋىن وتكىزەدى. بۇل ءداستۇردى ونىڭ الدىندا بولعان پاپا باستاعان. ۆاتيكان باسپا ءسوز قىزمەتىنىڭ مالىمەتىنشە، 90 ەلدەن شامامەن 7 مىڭ جۋرناليست اككرەديتاتسيا العان.
- گازا سەكتورىنداعى جاعداي مەنى قاتتتى الاڭداتادى. حالىققا گۋمانيتارلىق كومەك كورسەتىلىپ، بارلىق تۇتقىندار بوساتىلۋى ءتيىس. مەن ءۇندىستان مەن پاكىستان اراسىنداعى اتىستى توقتاتۋ تۋرالى جاڭالىقتى قۋانا قابىلدادىم. الداعى كەلىسسوزدەر ناتيجەسىندە تاتۋلاسۋ جونىندە كەلىسىم جاسالادى دەپ ۇمىتتەنەمىن، - دەدى ول «اسپان پاتشايىمى» دۇعاسىنان كەيىنگى ۇندەۋىندە.
جاڭا پونتيفيك قاسيەتتى پەتر الاڭىنا جينالعان 100 مىڭعا جۋىق ادامعا ارناعان سوزىندە تەك فرانتسيسك تۋرالى عانا ەمەس، يوانن پاۆەل II تۋرالى دا ەسكە سالىپ، ونىڭ ايگىلى «قورىقپاڭدار!» دەگەن ءسوزىن قايتالادى.
ەسكە سالا كەتەيىك، روبەرت پريەۆو جاڭا ريم پاپاسى بولىپ سايلاندى.
