ەۋرووداق ترامپتىڭ گازا بويىنشا جوسپارىنا قولداۋ بىلدىرۋگە دايىن
استانا. KAZINFORM - ەۋروپالىق كوميسسيانىڭ ءتورايىمى ۋرسۋلا فون دەر ليايەن ا ق ش پرەزيدەنتى دونالد ترامپ ۇسىنعان گازاداعى اتىستى توقتاتۋ جوسپارىن قۇپتاپ، ەۋروپالىق وداقتىڭ بۇل باستاماعا قولداۋ كورسەتۋگە دايىن ەكەنىن مالىمدەدى، دەپ حابارلايدى انادولى.
بۇل تۋرالى ول ا ق ش- تىڭ X الەۋمەتتىك جەلىسىندەگى پاراقشاسىندا جازدى.
بريۋسسەلدە ترامپتىڭ «گازاداعى سوعىستى توقتاتۋعا باعىتتالعان باستاماسىن» وڭ قابىلداعانىن اتاپ وتكەن فون دەر ليايەن، بارلىق تاراپتى وسى مۇمكىندىكتى پايدالانۋعا شاقىردى.
- قاقتىعىس گازاداعى تۇرعىندارعا شۇعىل گۋمانيتارلىق كومەك كورسەتۋ جانە تۇتقىنداردى دەرەۋ بوساتۋ ارقىلى اياقتالۋى ءتيىس. ەكى مەملەكەت نەگىزىندە شەشىم قابىلداۋ - تاياۋ شىعىستا ادىلەتتى ءارى تۇراقتى بەيبىت ومىرگە جەتۋدىڭ جالعىز جولى. بۇل - يزرايلدىكتەر مەن پالەستينالىقتار بەيبىتشىلىك پەن قاۋىپسىزدىك جاعدايىندا، زورلىق-زومبىلىقسىز ءومىر سۇرە الاتىن بولاشاق، - دەپ جازدى ول.
«شەشۋشى ءسات»
ەۋروپارلامەنت ءتورايىمى روبەرتا مەتسولا بۇل جوسپاردىڭ يزرايلگە قاۋىپسىزدىك، پالەستينالىقتارعا زاڭدى ءوزىن-ءوزى باسقارۋ قۇقىعى مەن مەملەكەتتىلىككە ۇمتىلۋ مۇمكىندىگىن، ال بۇكىل ايماققا - ءۇمىت بەرە الاتىنىن ايتتى.
- قازىر - شەشۋشى ءسات. ءبىز وسى مۇمكىندىكتى جىبەرىپ الماۋىمىز كەرەك، - دەدى ول.
«ۇزدىك مۇمكىندىك»
ە و- نىڭ سىرتقى ساياسات جانە قاۋىپسىزدىك جونىندەگى جوعارعى وكىلى كايا كاللاس بۇل جوسپاردى سوعىستى توقتاتۋدىڭ ەڭ جاقسى مۇمكىندىگى دەپ اتادى جانە ە و- نىڭ ونى جۇزەگە اسىرۋعا دايىن ەكەنىن راستادى.
- يزرايل بۇل جوسپارعا قول قويدى. حاماس ونى دەرەۋ قابىلداپ، الدىمەن تۇتقىنداردى بوساتۋى كەرەك، - دەدى كاللاس.
ترامپتىڭ گازا بويىنشا جوسپارى
بۇعان دەيىن اق ءۇي «گازاداعى قاقتىعىستى توقتاتۋعا ارنالعان كەشەندى جوسپاردى» جاريالادى. جوسپار 20 تارماقتان تۇرادى.
ا ق ش پرەزيدەنتى دونالد ترامپ بۇل قۇجاتتى يزرايل پرەمەر-ءمينيسترى بينيامين نەتانياحۋمەن بىرگە وتكەن باسپا ءسوز ءماسليحاتىندا تانىستىردى. ترامپتىڭ ايتۋىنشا، ەگەر تاراپتار بۇل جوسپاردى قابىلداسا:
سوعىس بىردەن توقتاتىلادى،
يزرايل اسكەرىن گازا سەكتورىنان كەزەڭ-كەزەڭىمەن شىعارادى،
حاماس - تا جاڭا ساياسي ۇدەرىس باستالادى،
بارلىق تۇتقىن بوساتىلادى.
نەتانياحۋ ءوز كەزەگىندە بۇل باستامانى قولداپ، جوسپار «سوعىس ماقساتتارىنا تولىق سايكەس كەلەدى» دەپ مالىمدەدى.
ەۋرووداق تاراپىنان العاشقى رەاكسيالاردىڭ ءبىرى ەۋروپالىق كەڭەس ءتوراعاسى انتونيۋ كوشتادان كەلىپ ءتۇستى. ول دا ترامپتىڭ باستاماسىن قۇپتاپ، تاراپتاردى بەرىلگەن مۇمكىندىكتى ءتيىمدى پايدالانۋعا شاقىردى.
ايتا كەتەيىك، بۇدان بۇرىن قازاقستان ا ق ش پرەزيدەنتى دونالد ترامپتىڭ گازا سەكتورىنداعى قاقتىعىستى توقتاتۋعا ارنالعان جان-جاقتى بىتىمگەرلىك جوسپارىن قولدايتىنىن جەتكىزدى.
