ەۋرووداق ا ق ش-قا تاۋارلارىنا سالىق سالماق

استانا. KAZINFORM - ەۋرووداق بيلىگى ا ق ش-تان كەلەتىن 72 ميلليارد ەۋرونىڭ تاۋارىنا باج سالىعىن دايىنداپ قويدى. بۇل ا ق ش پرەزيدەنتى دونالد ترامپتىڭ قوقان-لوقىسىنا جاۋاپ بولماق.

بۇل تۋرالى دۇيسەنبى، 14-ماۋسىم كۇنى ساۋدا جونىندەگى ەۋروكوميسسار ماروش شەفچوۆيچ ءمالىم ەتتى.

DW-نىڭ حابارلاۋىنشا، ەۋرووداق بيلىگى امەريكانىڭ قۇنى 72 ميلليارد ەۋرو بولاتىن تاۋارلارىنىڭ ءتىزىمىن دايىنداپ قويدى. ولارعا باج سالىعى سالىناتىن بولادى. بۇل ا ق ش-تىڭ سالىق ساياساتىنا جاۋاپ بولماق.

- بۇگىن ەۋروكوميسسيا ۇيىمعا مۇشە ەلدەرگە ا ق ش-تان يمپورتتالاتىن قۇنى 72 ميلليارد ەۋرو بولاتىن تاۋارلاردىڭ ءتىزىمى بويىنشا ۇسىنىس جاسايدى. ەندى ولار وسى ءتىزىمدى تالقىلاي الادى، - دەپ كەلتىردى شەنەۋنىكتىڭ ءسوزىن ە ك سايتى.

- بۇل ءبىزدىڭ سوڭعى قۇرالىمىز ەمەس، - دەدى م. شەفوۆيچ.

ول قانداي تاۋارلار تۋرالى اڭگىمە بولىپ جاتقانىن ناقتىلامادى.

سوعان قاراماستان بريۋسسەل ءالى دە بولسا ۆاشينگتونمەن كەلىسسوزدەر جۇرگىزۋگە دايىن.

- ءبىزدىڭ ترانساتلانتيكالىق قارىم-قاتىناستارىمىز كەلىسسوزدەر ارقىلى شەشىلۋگە لايىقتى، - دەدى ەۋروكوميسسار.

12-شىلدە كۇنى دونالد ترامپ ەۋرووداقتان كەلەتىن تاۋارلارعا 1-تامىزدان باستاپ، %30 كەدەندىك الىم سالۋدى جوسپارلاپ وتىرعانىن مالىمدەدى. ول بۇنى بريۋسسەل مەن ۆاشينگتون اراسىندا ەڭ ۇلكەن ساۋدا دەفيتسيتىمەن بايلانىستىرىپ وتىر.

اق ءۇي باسشىسى ەگەر ەۋروپالىق كومپانيالار ءونىمدى ا ق ش-تا شىعاراتىن بولسا، ولار ساۋدا سالىعىنان بوساتىلاتىنىن ايتتى.

سونداي-اق ترامپ ەگەر ەۋرووداق امەريكالىق تاۋارلارعا سالىق سالاتىن بولسا، وعان جاۋاپ تا تۋرا سونداي بولاتىنىن جەتكىزدى.