رومان سكليار ەكىنشى ا ە س ۆەندەرى تۋرالى: كۇزگە قاراي بەلگىلى بولادى

استانا. KAZINFORM - پرەمەر-ءمينيستردىڭ ءبىرىنشى ورىنباسارى رومان سكليار تاۋەلسىزدىك سارايىنداعى «ورتالىق ازيا- قىتاي» سامميتىنىڭ كۋلۋارىندا قازاقستاندا سالىنۋى مۇمكىن ەكىنشى اتوم ەلەكتر ستانساسىنىڭ ۆەندەرى قاشان انىقتالاتىنىن ايتتى.

- ەكىنشى ا ە س تۋرالى نە ايتاسىز؟ كىم سالادى، قۇنى قانشا بولادى؟ الاڭى تاڭدالدى ما، - دەپ سۇرادى ب ا ق وكىلدەرى.

ۆيتسە-پرەمەر ول شەشىمنىڭ ءبارى كۇزگە قاراي شىعادى دەگەن بولجام ايتتى.

- كۇزدە دەپ ويلايمىن. بۇل ماسەلەنى سونشا سوزبايتىن شىعارمىز. سوندىقتان كۇزگە قاراي ناقتى سيفرلار، قانداي دا ءبىر دەرەكتەر بەلگىلى بولاتىن شىعار. بالكىم ودان ەرتە بولۋى مۇمكىن. ستانسا سالىناتىن الاڭنىڭ ماسەلەسى دە سول كەزدە بەلگىلى بولاتىن شىعار، - دەدى رومان سكليار.

سونداي-اق، تەحنيكالىق-ەكونوميكالىق نەگىزدەمە مەن جوبا ازىرلەنبەي تۇرىپ، ەكى ا ە س- ءتىڭ دە ناقتى قۇنىن ەشكىم ايتا المايتىنىن جەتكىزدى.

بۇعان دەيىن اتوم ەنەرگەتيكاسى جونىندەگى اگەنتتىك ءتوراعاسى الماسادام ساتقاليەۆ قازاقستان ەكىنشى ا ە س سالاتىن كونسورسيۋمنىڭ تىزگىنىن قىتايعا بەرۋگە نيەتتى ەكەنىن ايتقان.

ءبىراق كەيىن ەكىنشى ا ە س-ءتى قىتاي سالاتىندىعىنا قاتىستى تۇپكىلىكتى شەشىم قابىلدانباعانىن ءمالىم ەتتى.

اۆتور

ەسىمجان ناقتىباي