ەۋروكوميسسيا پەستيسيدتەرگە قارسى كۇرەستە كەرى قادام جاسادى

استانا. KAZINFORM - ەۋروكوميسسيا ءتورايىمى ۋرسۋلا فون دەر ليايەن ە و اۋماعىندا زيانكەستەر مەن ارامشوپكە قارسى حيميالىق قۇرالدار پايدالانۋدى قىسقارتۋدى قاراستىراتىن زاڭ جوباسىن كەرى قايتارىپ الدى. بۇل وداققا مۇشە ەلدەردىڭ «جاسىل مامىلەسىنە» قاتتى سوققى بولىپ سانالادى، دەپ حابارلايدى Euronews.

تۇراقتى پايدالانۋ تۋرالى ەرەجە (SUR) العاش رەت 2022 -جىلدىڭ ماۋسىم ايىندا ۇسىنىلعان بولاتىن. ونىڭ ماقساتى 2030 -جىلعا قاراي پەستيسيدتەردىڭ قولدانىلۋىن ەكى ەسە قىسقارتۋ ەدى. ول سونداي-اق قالالىق ساياباقتار مەن ادام قولى تيمەگەن تابيعي جەرلەر سياقتى ايماقتاردا حيميكاتتارعا تولىق تىيىم سالۋدى قاراستىرعان.

SUR جوباسى اۋەلدەن-اق كەلىسپەۋشىلىك تۋدىرىپ، اۋىل شارۋاشىلىعى سەكتورى تاراپىنان قيان-كەسكى لوببيلەۋ نىسانىنا اينالدى. وتكەن جىلى ونى ەۋروپارلامەنت قابىلداعان جوق. قازىرگى كەزدە زاڭ جوباسى ە و-عا مۇشە ەلدەر اراسىنداعى ساياسي كەلىسسوزدەر كەزەڭىندە قالىپ وتىر. بۇل جوبانى سوڭىنا دەيىن جەتكىزۋگە نيەت از ەكەنىن تانىتىپ وتىر.

«كوميسسيا SUR-عا وسىمدىكتەردى قورعاۋدىڭ حيميالىق قۇرالدارىمەن بايلانىستى تاۋەكەلدى لايىقتى ماقساتپەن تومەندەتۋدى ۇسىندى. الايدا SUR ۇسىنىسى پولياريزاتسيا سيمۆولىنا اينالدى»، - دەدى فون دەر ليايەن سەيسەنبىدە ستراسبۋرگتە ەۋرودەپۋتتار اراسىندا سويلەگەن سوزىندە.

فون دەر ليايەننىڭ شەشىمى وڭشىل ساياساتكەرلەردىڭ ەۋروپانىڭ «جاسىل مامىلەگە» قارسىلىعىنىڭ كۇشەيۋى جانە قورشاعان ورتانى قورعاۋ ەرەجەلەرىنىڭ اۋىرتپالىعىنا شاعىمدانعان اشۋلى فەرمەرلەردىڭ كەڭ تارالعان نارازىلىقتارى جاعدايىندا قابىلداندى.

نارازىلىق قوزعالىسى وتكەن اپتادا ە و سامميتى كەزىندە بريۋسسەلگە جەتىپ، حاوس پەن قيراۋ تۋدىردى. فون دەر لەيەن بەلگيا جانە نيدەرلاند پرەمەر-مينيسترلەرىمەن بىرگە سامميتتەن كەيىن بىردەن اۋىل شارۋاشىلىعى سالاسىنىڭ وكىلدەرىمەن كەزدەسۋگە قاتىستى.

سەيسەنبى كۇنى تاڭەرتەڭ سويلەگەن سوزىندە ەۋروكوميسسيا باسشىسى زاڭ شىعارۋشىلاردى كليماتتىڭ وزگەرۋى، رەسەيدىڭ ۋكرايناعا باسىپ كىرۋى جانە ءومىر ءسۇرۋ داعدارىسىنىڭ سالدارىمەن بەتپە-بەت كەلگەن «فەرمەرلەر ۇنىنە قۇلاق اسۋعا» شاقىردى.

الايدا فون دەر ليايەن پارنيكتىك گازدار شىعارىندىلارىنىڭ %10 دان استامىنا تەڭ جانە ە و بيۋدجەتىنەن ايتارلىقتاي سۋبسيديالاناتىن سەكتور «تۇراقتى ءوندىرىس ۇلگىسىنە» كوشۋى ءتيىس دەپ سانايدى.

 

اۆتور
زارينا تۋعانبايەۆا