پروكۋرورلار 3 ايدا مىڭنان اسا تۇلعانىڭ قىلمىستىق پروتسەسكە تارتىلۋىنا جول بەرمەدى
استانا. KAZINFORM - پروكۋرورلار 2025 -جىلدىڭ 1- توقسانىندا مىڭنان استام تۇلعانىڭ قىلمىستىق پروتسەسكە تارتىلۋىنا جول بەرمەدى.
بۇل تۋرالى سەنات دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.
- تەرگەپ-تەكسەرۋ، قاداعالاۋ جانە سوت باقىلاۋى فۋنكسيالارىنىڭ بىرتىندەپ ءبولىنۋى، سونداي-اق پروكۋرورلىق سۇزگى پروتسەسكە قاتىسۋشىلاردىڭ قۇقىقتارى مەن بوستاندىقتارىنىڭ قىلمىستىق پروتسەستىڭ باستاپقى كەزەڭىنەن باستاپ سەنىمدى قورعالۋىن قامتاماسىز ەتۋگە باعىتتالعان. اتالعان شارالار ءوز تيىمدىلىگىن كورسەتىپ جاتىر. پروكۋرورلار 2025 -جىلعى 1- توقساندا جەتكىلىكتى نەگىزدەردىڭ بولماۋىنا بايلانىستى مىڭنان استام تۇلعانىڭ قىلمىستىق پروتسەسكە تارتىلۋىنا جول بەرمەدى، - دەدى ۇكىمەت باسشىسى.
ونىڭ اتاپ وتۋىنشە، قىلمىستىق-پروتسەستىك كودەكستە قول سۇعىلماۋشىلىق، كىناسىزدىك پرەزۋمپتسياسى، قورعانۋ جانە زاڭ كومەگىن الۋ قۇقىعى قاعيداتتارى بەكىتىلگەن. بۇل باستاپقى ساتىدا - قۇقىق بۇزۋشىلىق تۋرالى العاشقى اقپارات الىنعاندا ازاماتتاردىڭ قۇقىقتارىنىڭ قورعالۋىن قامتاماسىز ەتەدى.
- وسىعان بايلانىستى سوتقا دەيىنگى تەرگەپ-تەكسەرۋدىڭ باستاپقى كەزەڭدەرىندە ازاماتتار ءۇشىن قۇقىقتىق كەپىلدىكتەردى كۇشەيتۋ قىلمىستىق-پروتسەستىك زاڭنامانى جەتىلدىرۋ جانە تۇزەتۋ پروتسەسىندەگى باسىم باعىتتاردىڭ ءبىرى سانالادى، - دەدى ولجاس بەكتەنوۆ.
بۇعان دەيىن باس پروكۋروردىڭ ورىنباسارى جاندوس ومىراليەۆ سوڭعى 5 جىلدا ەلىمىزدە قىلمىس دەڭگەيى ايتارلىقتاي تومەندەگەنىن ايتقان ەدى. ماسەلەن، 2019 -جىلى 280 مىڭ قىلمىس تىركەلسە، 2024 -جىلى بۇل كورسەتكىش 133 مىڭعا دەيىن ازايعان.
اۆتور
مارلان جيەمباي
