پروكۋراتۋرا ورگاندارىنا رەفەرەندۋم تۋرالى 9 ءوتىنىش تۇسكەن
استانا. KAZIFORM – ق ر باس پروكۋراتۋراسى قوعامدىق مۇددەلەردى قورعاۋ قىزمەتىنىڭ باسقارما باستىعى بەكجان قارامانوۆ رەفەرەندۋم وتكىزۋدە زاڭنىڭ ساقتالۋى جانە سايلاۋ ۋچاسكەلەرىندە قۇقىقتىق ءتارتىپتى قامتاماسىز ەتۋ تۋرالى باياندادى.
«داۋىس بەرۋ پروتسەسى قۇقىقتىق الاڭ اياسىندا ءوتىپ جاتىر. رەفەرەندۋم كوميسسيالارى مەن مەملەكەتتىك ورگاندار تاراپىنان بۇزۋشىلىقتار تىركەلگەن جوق. رەفەرەندۋم تۋرالى جولدانىمدارعا كەلسەك، سوتتار مەن پروكۋراتۋرا ولاردى بۇگىن دەرەۋ قارايتىن بولادى. جالپى پروكۋراتۋرا ورگاندارىنا بيىلعى 6-قازانعا دەيىن 9 جولدانىم كەلىپ ءتۇستى. بۇل ساۋالناما جۇرگىزۋ، ۇگىت- ناسيحات جانە داۋىس بەرۋ ماسەلەلەرىنە قاتىستى بولدى. بارلىعى بويىنشا زاڭعا تۇسىندىرمە بەرىلدى»، - دەدى ب. قارامانوۆ ورتالىق كوممۋنيكاتسيالار قىزمەتىندە.
سپيكەر بۇگىن ياعني داۋىس بەرۋ كۇنى ۇگىت-ناسيحات جۇمىستارىن جۇرگىزۋگە تىيىم سالىنعانىن اتاپ ءوتتى.
«سونداي-اق ساۋال سالۋ ناتيجەلەرىن ماسس- مەديا مەن ونلاين پلاتفورمالاردا جاريالاۋعا جول بەرىلمەيدى. مۇنداي ساۋالنامالاردى ۋچاسكەلىك كوميسسيالارعا داۋىس بەرۋ ءۇي-جايلارىندا دا جۇرگىزۋگە تىيىم سالىندى. وسى تالاپتاردى ساقتاماۋ اكىمشىلىك قۇقىقبۇزۋشىلىق تۋرالى كودەكستىڭ 102-جانە 120-باپتارى بويىنشا جاۋاپكەرشىلىككە اكەپ سوعادى. قازىرگى تاڭدا مۇنداي فاكتىلەر تۋرالى حابارلاما تۇسكەن جوق»، - دەدى باس پروكۋراتۋرا وكىلى.
اۆتور
ايجان سەرىكجان قىزى
