پروكۋراتۋرا «قازاقستان تەمىر جولى» كومپانياسىن تەكسەرۋى كەرەك - ءماجىلىس دەپۋتاتى
ءماجىلىس دەپۋتاتى اجار ساعاندىقوۆا تۇرعىندارعا كومىردىڭ ۋاقىتىلى جەتكىزىلۋىنە الاڭداۋشىلىق ءبىلدىرىپ وتىر، دەپ حابارلايدى قازاقپارات ءتىلشىسى.

«ءبىز حالىققا كومىر جەتكىزۋ ماسەلەسىن كوتەرمەكپىز. قاراعاندى وبلىسىنىڭ جەر قويناۋىن پايدالانۋشى كومپانيالاردىڭ دەرەكتەرى بويىنشا «رازرەز كۋزنەتسكي» ج ش س جانە SAT Komir ج ش س كومىر تاسىمالداۋعا ۆاگونداردىڭ %22 عانا بولگەن. بۇل قازاقستاندىقتاردى كومىرمەن تولىق قامتۋعا كەدەرگى كەلتىرەدى. ءبىزدىڭ مالىمەتتەرىمىز بويىنشا، قازاقستاندا جىلجىمالى پاركتىڭ تەك ەكى ءىرى وپەراتورى بار: «قازتەمىرترانس» ا ق جانە «ق ت ج - جۇك تاسىمالى» ج ش س. ولار «قازاقستان تەمىر جولى» ا ق- نىڭ ەنشىلەس كومپانيالارى. ال «قازتەميرترانس» ا ق بالانسىندا 40 مىڭعا جۋىق جۇك ۆاگونى بار»، - دەدى اجار ساعاندىقوۆا پرەمەر-ءمينيستردىڭ اتىنا ساۋال جولداي وتىرىپ.
حالىق قالاۋلىسىنىڭ ايتۋىنشا، كومىر جەتكىزۋ جىل سايىن پروبلەما بولىپ وتىر. وڭىرلەردىڭ اكىمدىكتەرى كومىردى جەتكىزۋدى قولمەن رەتتەۋگە ءماجبۇر.
«كومىردى جەتكىزۋدەگى ىركىلىستىڭ سەبەپتەرى ۆاگونداردى ۋاقىتىلى جەتكىزبەۋ جانە حالىققا كومىر جونەلتۋ كەستەسىنىنىڭ ارتتا قالۋىمەن بايلانىستى. بىرنەشە جىلدان بەرى ءبىز بارلىق ايماقتا كومىر كەزەگىنىڭ ءوسىپ كەلە جاتقانىن بايقايمىز. كەيدە ونىڭ ارتى قاقتىعىستارعا ۇلاسىپ جاتادى. الىپساتارلار بۇنى ءساتتى پايدالانادى. سالدارىنان قاراپايىم حالىق كومىرسىز قالادى، اسىرەسە مۇقتاج جاندار»، - دەدى.
ءسوز سوڭىندا دەپۋتات ۇكىمەت باسشىسى ءاليحان سمايىلوۆقا ەكى ۇسىنىس جاسادى.
كومىردى تاسىمالداۋ بويىنشا بارلىق كاسىپورىندار ءۇشىن تەڭ جاعدايدى قامتاماسىز ەتۋ؛
«قازاقستان تەمىر جولى» ۇلتتىق كومپانياسى» ا ق قىزمەتىنە پروكۋرورلىق تەكسەرۋ جۇرگىزۋ.