ەۋروپالىقتارعا ۇيدەن جۇمىس ىستەپ، كولىكتى كوپ پايدالانباۋ ۇسىنىلدى

استانا. KAZINFORM - ەۋروپالىق وداق ەلدەرىنىڭ تۇرعىندارى قاشىقتان جۇمىس ىستەۋگە ورالۋعا جانە جەكە كولىكتەرىن پايدالانۋدى ازايتۋعا شاقىرىلدى.

بۇل ۇسىنىستاردى ەنەرگەتيكا جونىندەگى ەۋروپالىق كوميسسار دان يورگەنسەن جاريالادى، دەپ حابارلايدى Kazinform اگەنتتىگىنىڭ ە و- داعى ءتىلشىسى.

Politico باسىلىمىنىڭ حابارلاۋىنشا، سەيسەنبى كۇنى بريۋسسەلدە ەۋروپالىق كوميسسار دان يورگەنسەن ەنەرگيا تاپشىلىعىن شەشۋگە ارنالعان جاڭارتىلعان ءىس-قيمىل جوسپارىن ۇسىندى. شەنەۋنىكتىڭ ايتۋىنشا، قازىرگى جاعداي ەۋروپالىق ازاماتتاردان ايماقتىڭ ەنەرگەتيكالىق قاۋىپسىزدىگىن قامتاماسىز ەتۋ ءۇشىن كۇندەلىكتى ادەتتەرىن وزگەرتۋدى تالاپ ەتەدى.

مىسالى، ەۋروپالىقتارعا قاشىقتان جۇمىس ىستەۋگە كوشۋ ۇسىنىلادى، بۇل وتىن شىعىنىن ازايتۋعا كومەكتەسەدى. جالپى، ازاماتتارعا كولىكپەن ءجۇرۋدى ازايتۋعا، قوعامدىق كولىكپەن جۇرۋگە جانە اۋە ساپارلارىن ازايتۋعا كەڭەس بەرىلەدى.

سونىمەن قاتار، بەنزين مەن ديزەل وتىنىن تۇتىنۋدى وڭتايلاندىرۋ ءۇشىن اۆتوجولداردا ەرىكتى «ۇنەمدى رەجيم» ۇسىنىلادى.

ەۋروپالىق ساراپشىلار ەۋروپاداعى وتىن جاعدايىن تاياۋ شىعىستاعى تۇراقسىزدىقپەن بايلانىستىرادى. پارسى شىعاناعىنداعى ماڭىزدى ەنەرگەتيكالىق ينفراقۇرىلىمعا كەلتىرىلگەن زالال جانە ورمۋز بۇعازىنىڭ شەكتەلۋى مۇناي مەن گاز جەتكىزىلىمدەرىنىڭ جاھاندىق تومەندەۋىنە اكەلدى.

- ءبىز ازاماتتارىمىزعا شىنايى بولۋىمىز كەرەك: بۇل داعدارىس ەرتەڭ اياقتالمايدى. ءتىپتى قولايلى ساياسي سەناري كەزىندە دە ەۋروپالىق ەكونوميكا ارزان ەنەرگيا وتكەننىڭ ەنشىسىندە قالعان جاڭا شىندىققا تاپ بولادى، - دەپ اتاپ ءوتتى ەۋروپالىق كوميسسار دان يورگەنسەن.

ۇنەمدەۋ تۋرالى ۇندەۋلەردەن باسقا، ەۋروپالىق كوميسسيا جاڭارتىلاتىن ەنەرگيا كوزدەرىنە (ج ە ك) كوشۋ باعدارلاماسىن ىسكە اسىرۋدى جەدەلدەتۋدى كوزدەپ وتىر. جاقىن ارادا وسال سالالار مەن ءۇي شارۋاشىلىقتارىن قولداۋعا باعىتتالعان توتەنشە شارالار پاكەتى ۇسىنىلماقشى.

بۇعان دەيىن حالىقارالىق ەنەرگەتيكا اگەنتتىگى (ح ە ا) يمپورتتاۋشى ەلدەردىڭ ۇكىمەتتەرىنە كەلەسى جىلىتۋ ماۋسىمىندا ەلەكتر قۋاتى مەن جىلۋ ەنەرگياسىنىڭ ۇزىلۋىنە جول بەرمەۋ ءۇشىن سۇرانىستى باسقارۋ شارالارىن ەنگىزۋدى ۇسىنعان بولاتىن.

ءوز كەزەگىندە ەو تاياۋ شىعىستاعى ەنەرگەتيكالىق نىساندارعا شابۋىلداردى توقتاتۋعا شاقىردى.