ەۋروپالىق وداقتا ەلەكتروموبيلدەرگە دەگەن قىزىعۋشىلىق تومەندەدى
استانا. قازاقپارات - 2024 -جىلى ەۋروپالىق وداقتا (ە و) جاڭا كولىكتەر اراسىنداعى ەلەكتروموبيلدەردىڭ ۇلەسى %13,6 عا دەيىن تومەندەدى. بۇل - 2015 -جىلدان بەرى العاش رەت تىركەلگەن تومەندەۋ، دەپ جازدى ءازارتادج.
ءازارتادج ەۋروپالىق ستاتيستيكالىق باسقارما (ەۆروستات) تاراتقان سوڭعى ەسەپكە سىلتەمە جاساي وتىرىپ حابارلاعانداي، بىلتىر ە و ەلدەرىندە تەك اككۋمۋلياتورمەن جۇمىس ىستەيتىن 1,45 ميلليون جاڭا اۆتوكولىك تىركەلگەن. بۇل 2023 -جىلمەن سالىستىرعاندا %6,1 عا از.
سالىستىرۋ ءۇشىن ايتا كەتسەك، 2023 -جىلى بۇل كورسەتكىش 1,55 ميلليون بولعان. ساراپشىلار بۇل قۇبىلىستى ەل تۇرعىندارىنىڭ ەلەكتروموبيلدەرگە قىزىعۋشىلىعىنىڭ تومەندەۋىمەن تۇسىندىرەدى.
2015 -جىلدان 2023 -جىلعا دەيىن ەلەكتروموبيلدەر سانى جىل سايىن ورتا ەسەپپەن %58 عا ارتىپ وتىرعان. جالپى العاندا، 2024 -جىلدىڭ سوڭىنا قاراي ە و اۋماعىندا 5,87 ميلليون اككۋمۋلياتورمەن جۇمىس ىستەيتىن كولىك پايدالانىلىپ جاتىر. بۇل 2023 -جىلمەن سالىستىرعاندا %32,4 عا كوپ (سول جىلى 4,43 ميلليون بولعان).
ەلەكتروموبيلدەر ۇلەسى بويىنشا ەڭ جوعارى كورسەتكىشتەر دانيادا (%51,3) ، مالتادا (%37,7) جانە شۆەتسيادا (%34,9) تىركەلگەن. ال وڭتۇستىك جانە ورتالىق ەۋروپا ەلدەرىندە بۇل كورسەتكىش وتە تومەن. ماسەلەن، حورۆاتيا ە و ەلدەرى اراسىندا ەڭ سوڭعى ورىندا - بار بولعانى %1,8. سونداي-اق، سلوۆاكيا (%2,4) مەن پولشا (%3) دا ارتتا قالعان ەلدەردىڭ قاتارىندا.
ايتا كەتەيىك، 2018 -جىلعا دەيىن جاڭا ەلەكتروموبيلدەردىڭ ۇلەسى جالپى تىركەۋلەر ىشىندە %1 دان تومەن بولعان. دەگەنمەن كەيىنگى جىلدارى بۇل كورسەتكىش تۇراقتى تۇردە ءوسىپ كەلدى:
2020 -جىلى - %5,3،
2021 -جىلى - %9،
2022 -جىلى - %12,1،
2023 -جىلى - %14,6.
بولاشاقتا بۇل ءۇردىس جالعاسادى ما، جوق پا - ونى نارىقتىق جانە تەحنولوگيالىق فاكتورلار انىقتايتىن بولادى، دەپ مالىمدەدى ەۋروپالىق ستاتيستيكالىق باسقارما.
