ەۋروپالىق وداق تاسقىن سۋدان زارداپ شەككەندەرگە 200000 ەۋرو كولەمىندە
بريۋسسەل.قازاقپارات – 117000 نان استام ادام زارداپ شەككەن قازاقستاننىڭ بىرنەشە وبلىستارىندا بولعان اۋقىمدى سۋ تاسقىنىنا بايلانىستى ەۋروپالىق وداق ەڭ كوپ زارداپ شەككەن وتباسىلارعا كومەك رەتىندە 200000 ەۋرو كولەمىندە گۋمانيتارلىق كومەك ءبولدى.
قازاقستان رەسپۋبليكاسىنىڭ قىزىل جارتى اي قوعامىنا قولداۋ كورسەتۋ اياسىندا ە و- تىڭ بۇل قارجىلاندىرۋى اسا قاجەتتى شۇعىل كومەكتى، سونىڭ ىشىندە ماتراستار مەن توسەك-ورىن جابدىقتارى، كوپ ماقساتتى اقشالاي قاراجات پەن گيگيەنالىق ماتەريالدار سياقتى تۇرمىستىق زاتتارمەن قامتاماسىز ەتۋگە باعىتتالدى.
«الداعى ءۇش اي ىشىندە كورسەتىلەتىن گۋمانيتارلىق كومەك سۋ تاسقىنىنان اۋىر زارداپ شەككەن 5 مىڭ ادامعا تىكەلەي باعىتتالاتىن بولادى. وتباسىن ۇستاپ وتىرعان ايەلدەرگە، مۇگەدەك نەمەسە قارت ادامدارى بار وتباسىلارعا، ءۇش بالادان كوپ بالاسى بار وتباسىلارعا كومەك كورسەتۋگە ەرەكشە كوڭىل بولىنەتىن بولادى»، - دەلىنگەن حابارلامادا.
قارجىلاندىرۋدى ە و حالىقارالىق قىزىل كرەست جانە قىزىل جارتى اي قوعامدارى فەدەراتسياسىنىڭ توتەنشە جاعدايلارعا قارسى ارەكەت ەتۋ قورىنىڭ جالپى جارناسىنان بولگەن.
ءساۋىر ايىنىڭ باسىندا تولاسسىز جاۋعان جاڭبىر مەن كوكتەمگى قار سۋىنان كەيىن قازاقستاننىڭ بىرنەشە وڭىرىندە سۋ تاسقىنى بولىپ، 117 مىڭنان استام ادام ۇيلەرىن تاستاپ كەتۋگە ءماجبۇر بولدى. سۋ تاسقىنىنىڭ شارىقتاۋ شەگى اقمولا، اقتوبە جانە قاراعاندى وبلىستارىندا ءوتىپ ۇلگەرسە، شىعىس قازاقستان وبلىسىندا ءبىر اپتادان كەيىن شارىقتاۋ شەگىنە جەتەدى دەپ كۇتىلىپ وتىر. الداعى ۋاقىتتا باتىس قازاقستان وبلىسىندا سۋ تاسقىنىنىڭ ەكىنشى تولقىنى بولۋى مۇمكىن. سۋ تاسقىنى سالدارىنان 5700 دەن استام مال قىرىلىپ، قازىر 60 مىڭ باس باسقا جەرگە قونىستاندىرىلدى. بيلىك وكىلدەرى سۋ تاسقىنىنان زارداپ شەككەن اۋدانداردان ادامداردى ەۆاكۋاتسيالادى، ال ۇلتتىق قىزىل كرەست/ قىزىل جارتى اي قوعامى گيگيەنالىق قۇرالداردى، ماتراستار مەن توسەك- ورىنداردى تاراتىپ، سۋ ارقىلى بەرىلەتىن اۋرۋلار تۋرالى دەنساۋلىققا قاتىستى نەگىزگى اقپارات بەرە باستادى. قىزىل جارتى اي قوعامى قونىس اۋدارعان ادامداردى قورعاۋ قاجەتتىلىكتەرىن دە باعالاپ وتىر.
انىقتامالىق اقپارات
ەۋروپالىق وداق جانە وعان مۇشە مەملەكەتتەر گۋمانيتارلىق كومەكتىڭ دۇنيەجۇزىندەگى ءىرى دونورى بولىپ تابىلادى. بۇل بۇكىل الەمدەگى كومەككە مۇقتاج ادامدارعا كورسەتىلگەن ەۋروپالىق نيەتتەستىكتىڭ كورىنىسى. كومەك ادامداردىڭ ءومىرىن ساقتاپ قالۋعا، ادامداردىڭ قايعى-قاسىرەتىنىڭ الدىن الۋ مەن ونى جەڭىلدەتۋگە، سونداي- اق تابيعي اپاتتار مەن تەحنوگەندىك داعدارىستارعا ۇشىراعان حالىقتىڭ دەربەستىگى مەن ابىرويىن قورعاۋعا باعىتتالعان.
گۋمانيتارلىق كومەك جانە ازاماتتىق قورعاۋ دەپارتامەنتىنىڭ جۇمىسى اياسىندا ەۋروپالىق وداق جىل سايىن قاقتىعىستار مەن تابيعي اپاتتاردىڭ ميلليوننان استام قۇرباندارىنا كومەكتەسەدى. شتاب- پاتەرى بريۋسسەل قالاسىندا ورنالاسقان، الەم بويىنشا وكىلدىكتەرى بار ەۋروپالىق وداق ەڭ وسال توپتارعا گۋمانيتارلىق قاجەتتىلىكتەر نەگىزىندە كومەك كورسەتىپ كەلەدى.
ەۋروپالىق وداق تابيعي اپات جاعدايىندا توتەنشە جاعدايلارعا قارسى ارەكەت ەتۋ قورىنا (DREF) قولداۋ كورسەتۋ ءۇشىن قىزىل كرەست جانە قىزىل جارتى اي حالىقارالىق قوعامدار فەدەراتسياسىمەن (IFRC) 8 ميلليون ەۋرو كولەمىندە گۋمانيتارلىق جارنا بويىنشا كەلىسىمگە قول قويدى. DREF قاراجاتى نەگىزىنەن «ۇساق اۋقىمدى» اپاتتارعا بولىنەدى، ياعني رەسمي حالىقارالىق ۇندەۋدى تالاپ ەتپەيتىن جاعدايلاردا قولدانىلادى.
توتەنشە جاعدايلارعا قارسى ارەكەت ەتۋ قورى 1985 -جىلى قۇرىلدى جانە دونورلىق جارنالار ارقاسىندا قىزمەت ىستەيدى. ۇلتتىق قىزىل كرەست نەمەسە قىزىل جارتى اي قوعامى اپاتقا قارسى ارەكەت ەتۋ ءۇشىن شۇعىل قارجىلىق قولداۋدى قاجەت ەتەتىن كەزدە، ول DREF قورىنان قاراجات سۇراي الادى. كىشىگىرىم تابيعي اپاتتار جاعدايىندا IFRC قوردان گرانتتار بولەدى، ولاردى دونورلار ءارى قاراي تولىقتىرا الادى. IFRC مەن ECHO اراسىنداعى جارنا تۋرالى كەلىسىم سوڭعىسىنا جالپى سوماسى 10 ميلليون ەۋروعا دەيىنگى كەلىسىلگەن وپەراتسيالار ءۇشىن (ونىڭ گۋمانيتارلىق مانداتىنا سايكەس كەلەتىن) DREF قورىن تولتىرۋعا مۇمكىندىك بەرەدى.
