ەۋروپالىق وداق پەن قازاقستان اراسىندا ماڭىزى ەكى كەلىسىمگە قول قويىلدى
استانا. KAZINFORM - حالىقارالىق ارىپتەستىك جونىندەگى ەۋروپالىق كوميسسار يوزەف سيكەلانىڭ استاناعا العاشقى رەسمي ساپارى اياسىندا ە و مەن قازاقستان اراسىندا ماڭىزدى ەكى كەلىسىمگە قول قويىلدى.
- ءبىز جاڭا عانا ەۋروپالىق وداق پەن قازاقستان اراسىندا جاسالعان ەكى ماڭىزدى كەلىسىمگە كۋا بولدىق. بۇعان دەيىن مەن قۇرمەتتى مۇرات نۇرتىلەۋ مىرزامەن جانە ونىڭ ارىپتەستەرىمەن كەزدەستىم. كەزدەسۋدە ە و مەن قازاقستان اراسىنداعى ارىپتەستىكتىڭ ماڭىزدى تۇستارى تالقىلاندى. ءبىز سەنىمدى ءارى شىنايى ارىپتەستەرمىز. «Global Gateway» ستراتەگياسى قازاقستانمەن ءوزارا ءتيىمدى قارىم-قاتىناس قۇرۋعا مۇمكىندىك بەرەدى. ءبىزدىڭ ەكونوميكالارىمىز ەنەرگەتيكالىق جانە سيفرلىق سەرپىلىس جاساۋ ءۇشىن تەحنولوگيالارعا تاۋەلدى. ە و- عا ءوز ەكونوميكاسىن جاڭعىرتۋ ءۇشىن اسا ماڭىزدى شيكىزاتتار ماسەلەسى وزەكتى. قازاقستان تاراپىنا دا كەن ءوندىرۋ سالاسىن جاڭعىرتۋ ماسەلەسى ماڭىزدى. سوندىقتان ەۋروپا قايتا قۇرۋ جانە دامۋ بانكىمەن جاسالعان كەلىسىم اسىرەسە اسا ماڭىزدى شيكىزاتتار سالاسىنداعى ارىپتەستىكتى ارتتىرۋدا ۇلكەن ءرول وينايدى، - دەدى يوزەف سيكەلا.
اتاپ ايتساق، مىنانداي قۇجاتتارعا قول قويىلدى:
قازاقستاننىڭ دامۋ بانكىنىڭ باسقارما ءتوراعاسى مارات ەلىبايەۆ پەن ەۋروپالىق ينۆەستيتسيالىق بانكى ءتوراعاسىنىڭ ورىنباسارى ەندريۋ ماكداۋەلل قازاقستاننىڭ دامۋ بانكى مەن ەۋروپالىق ينۆەستيتسيالىق بانكىنىڭ نەسيەلىك كەلىسىمىنە قول قويدى.
ەۋروپا قايتا قۇرۋ جانە دامۋ بانكىنىڭ قازاقستانداعى وكىلدىگى باسشىسىنىڭ ورىنباسارى اسقار نامازبايەۆ پەن ەۋروپالىق كوميسسيا حالىقارالىق ارىپتەستىك دەرەكتوراتىنىڭ ازيا-تىنىق مۇحيتى ايماعى بويىنشا ديرەكتورى پەتەريس ۋستۋبس ەۋروپا قايتا قۇرۋ جانە دامۋ بانكى مەن ەۋروپالىق وداق اراسىنداعى «ورتالىق ازياداعى ماڭىزدى شيكىزات سالاسىنداعى قىزمەتتى كەڭەيتۋ» وڭىرلىك جوباسىنا قول قويدى.
وسىعان دەيىن ەۋروپالىق وداقتىڭ تاريحتا العاش رەت ديپلوماتيالىق اكادەميا قۇراتىنى تۋرالى جازدىق.
