ەۋروپالىق عارىش اگەنتتىگى الاكولدىڭ بىرەگەي سۋرەتىن جاريالادى
استانا. KAZINFORM - ەۋروپالىق عارىش اگەنتتىگى (ESA) قازاقستانداعى «الاكول» كولىنىڭ پاليتراسىن بەينەلەيتىن بىرەگەي سپۋتنيكتىك سۋرەتتى كوپشىلىك نازارىنا ۇسىندى. بۇل تۋرالى «Kazakh Tourism» ۇلتتىق كومپانياسى» ا ق ءمالىم ەتتى.
بۇل 3 راديولوكاتسيالىق ءتۇسىرىلىمدى بىرىكتىرەدى جانە 2025 -جىلعى كوكتەم مەزگىلىندەگى سۋ ايدىنى مەن لاندشافتتاعى ماۋسىمدىق وزگەرىستەردى باقىلاۋعا مۇمكىندىك بەرەدى. ESA ناۋرىز، ءساۋىر جانە مامىر ايلارىندا تۇسىرىلگەن ءۇش بولەك رادارلىق سۋرەتتى بىرىكتىردى. ءتۇسىرىلىم Copernicus Sentinel-1 سپۋتنيگى ارقىلى جۇرگىزىلگەن. ءار سۋرەتكە جەكە ءتۇس بەرىلگەن.
الاكول اتاۋى «الا كول» دەگەندى بىلدىرەدى. سۋرەتتە ونى ءتۇسىرىلىم كەزىندەگى كول بەتىندەگى مۇز قاباتىنىڭ وزگەرۋىنە بايلانىستى كوك جانە جاسىل ءتۇستىڭ ءارتۇرلى رەڭكتەرىندە كورۋگە بولادى. بۇل تۇزدى كول قىستا شامامەن ەكى اي بويى مۇزبەن جابىلىپ، ەرتە كوكتەمدە اشىلاتىندىقتان، كوگىلدىر بولىپ كورىنەدى. سەبەبى ناۋرىز ايىنداعى ءتۇسىرىلىم كەزىندە ونىڭ بەتى نەگىزىنەن قاتىپ تۇرعان، - دەپ اتاپ وتەدى ESA.
سۋرەتتە الاكولدىڭ سولتۇستىك-باتىسىندا ورنالاسقان كورشىلەس «كوشكاركول» جانە «ساسىككول» كولدەرى دە كورسەتىلگەن. ولاردىڭ اينالاسى سارى، قىزعىلت جانە كۇلگىن تۇستەرگە بويالىپ، كوكتەم كەزىندەگى وسىمدىكتەردىڭ وزگەرۋىن كورسەتەدى. ESA «الاكول- ساسىككول» كولدەر جۇيەسى رامسار كونۆەنتسياسى بويىنشا حالىقارالىق ماڭىزدى سۋلى- باتپاقتى القاپ ەكەندىگىنە جانە يۋنەسكو بيوسفەرالىق رەزەرۆاتتار تىزىمىنە ەنگەنىنە نازار اۋدارادى. ولار دالماتين پەليكانى مەن ۇلكەن قوقيقاز ءتارىزدى ءارتۇرلى قۇستاردىڭ ماڭىزدى كوشى- قون باعىتى جانە ۇيا سالاتىن ورنى.
الاكول العاش رەت وزىنە نازار اۋدارتىپ وتىرعان جوق. بۇل كول - بۇرىننان بەرى ءوزىنىڭ مينەرالدى جانە ەمدىك قاسيەتتەرىمەن تانىمال. كەڭەستىك كەزەڭدە عارىشكەرلەر جەرگە ورالعان سوڭ، اعزانى قالپىنا كەلتىرۋ جانە عارىشتىق رادياتسيادان تازارتۋ ماقساتىندا الاكولگە جىبەرىلگەن. بۇگىندە ونىڭ شيپالى سۋى مەن قۇرامى ەرەكشە بالشىعى تۋريستەردىڭ قىزىعۋشىلىعىن وياتادى.
ايتا كەتەيىك، 2022 -جىلدان بەرى Kazakh Tourism «Kids Go Free» باعدارلاماسىن جۇزەگە اسىرىپ كەلەدى جانە ونىڭ اياسىندا «الاكول» كولى ەكىنشى جىل قاتارىنان ەڭ سۇرانىسقا يە دەستيناتسياعا اينالىپ وتىر.
2024 -جىلى 700 استام بالا بۇل باعىت بويىنشا تەگىن اۋە بيلەتتەرىن يەلەنسە، تۋروپەراتورلار 330 دان استام تۋردى ساتتى.
بۇعان دەيىن حابارلانعانداي، الاكول جاعالاۋىندا 2018 -جىلدان بەرى جوندەۋ جۇمىستارى جۇرگىزىلمەگەن.
