ەۋروپا ليگاسى: بۇگىن شيرەك فينال ويىندارى وتەدى

استانا. KAZINFORM - بۇگىن UEFA ەۋروپا ليگاسى شيرەك فينالىنىڭ قارىمتا كەزدەسۋلەرى وتەدى.

جارىستىڭ اتالعان ساتىسىنداعى ماتچتار قازاقستاندىق ۋاقىتپەن 23:50 دە باستالادى.

الدىمەن «Qazaqstan» تەلەارناسىنان «اينتراحت» (گەرمانيا) پەن «توتتەنحەم حوتسپۋرس» (انگليا) كەزدەسۋى كورسەتىلەدى. ءبىرىنشى ويىندا 1:1 ەسەبى تىركەلدى.

سونداي-اق ءدال وسى ۋاقىتتا جانكۇيەرلەر «Qazsport» تەلەارناسىنان «مانچەستەر يۋنايتەد» (انگليا) پەن «ليون» (فرانسيا) ويىنىن تاماشالاي الادى. العاشقى كەزدەسۋدە كوماندالار 2:2 ەسەبىنە قاناعات ءبىلدىردى.

شيرەك فينالداعى تاعى ءبىر كەزدەسۋدە يسپانيالىق «اتلەتيك» پەن شوتلانديالىق «گلازگو رەيندجەرس» شەبەرلىك بايقاسادى. العاشقى ويىندا ولار 0:0 سەبىمەن تەڭ ءتۇستى.

شيرەك فينالداعى تاعى ءبىر ويىن «لاتسيو» (يتاليا) مەن «بودو-گليمت» (نورۆەگيا) اراسىندا وتەدى. العاشقى كەزدەسۋدە نورۆەگيالىق كلۋب 2:0 ەسەبىمەن باسىم ءتۇستى.

ەۋروپا ليگاسى ويىندارى 2009-جىلدان بەرى تۇراقتى تۇردە وتكىزىلىپ كەلەدى. بىلتىر يتاليانىڭ «اتالانتا» كومانداسى اتالعان تۋرنيردىڭ جەڭىمپازى اتاندى.

بۇعان دەيىن چەمپيوندار ليگاسىنىڭ جارتىلاي فينالىنا شىققان ەكى كوماندا انىقتالعانىن جازعان ەدىك.