ەۋروپا جەرگە جاقىن كەڭىستىكتى تازارتۋدى قولعا الدى

 استانا. KAZINFORM - ەۋروپا عارىش اگەنتتىگىنىڭ نولدىك قالدىقتار حارتياسى 2030 -جىلعا قاراي جارامسىز سپۋتنيكتەردى جەرگە قايتارىپ، جويۋعا نەمەسە زيانسىز ەتۋگە شاقىردى، دەپ حابارلايدى euronews.

جەرگە جاقىن كەڭىستىك تارىلىپ جاتىر. وعان كوپتەگەن جاساندى سپۋتنيكتەر ۇشىرىلدى.

ونىڭ كوبى جەردەن مىڭ شاقىرىمداي تومەن وربيتادا قوزعالادى نەمەسە 30 مىڭ ك م بيىكتىكتە گەوستاتسيونارلىق وربيتادا ءىلىنىپ تۇر.

بۇدان باسقا، عارىشتا قوقىس كوپ جينالدى. بۇل كەڭىستىكتى تۇراقتى، تازا جانە قاۋىپسىز ۇستاۋ قاجەتتىگى ارتىپ كەلەدى.

ەۋروپا عارىش اگەنتتىگىنىڭ بريۋسسەلدەگى فورۋمىندا تالقىلانعان تاقىرىپتاردىڭ ءبىرى وسى بولدى.

كەي كومپانيالار سپۋتنيكتەردىڭ كومەگىمەن عالامشارىمىزدىڭ شالعاي جەرلەرىنە ينتەرنەتكە قالاي قول جەتكىزەتىنىن ايتتى.

«ءبىزدىڭ بارلىق جەرسەرىكتەرىمىزدىڭ بەلسەندى قوزعالىس جۇيەلەرى بولادى. ۇلكەن قاقتىعىستاردىڭ الدىن الۋ ءۇشىن ولاردى مانيەۆرلەي الامىز. بۇل قۇرىلعىلارىمىز ۇساق قوقىستاردىڭ زاقىمدانباۋى ءۇشىن ارنايى ساۋىتپەن قاپتالعان. سپۋتنيكتەردىڭ ەڭ ماڭىزدى ەلەمەنتتەرى قورعالادى»، - دەدى Amazon Kuiper جوباسىنىڭ قاتىسۋشىسى دجوردي كازانوۆا.

اگەنتتىكتىڭ مالىمەتىنشە، جەر وربيتاسىندا شامامەن 12,5 مىڭ سپۋتنيك بار. جۇمىس مەرزىمى اياقتالعاننان كەيىن ولاردى جويۋ، جەرگە قايتارۋ نەمەسە زالالسىزداندىرۋ كەرەك.

«عارىشتىق جارىس قارقىن الىپ كەلەدى. قازىر مىسالى، قۇراما شتاتتار سپۋتنيكتەر مەن كەمەلەردىڭ بۇكىل ءتۇرىن پايدالانىپ جاتىر. جەرگە جاقىن كەڭىستىك تەك اسكەريلەرگە عانا ەمەس، بيزنەسكە دە قىزمەت ەتۋدە. جەكەمەنشىك فيرمالار عارىشقا ءوز سپۋتنيگىن ۇشىرۋعا كوبىرەك قىزىعۋشىلىق تانىتۋدا»، - دەدى ەۋروپا عارىش اگەنتتىگىنەن گيزەلا زيۋسس.

ءبىراق ەڭ كۇردەلى ماسەلە - مۇنداي اپپاراتتار عارىشتا قالا وتىرىپ، ۋاقىت وتە كەلە جۇمىسىن توقتاتادى. 2,7 مىڭعا جۋىق سپۋتنيك وسىنداي جاعدايدا.

بۇدان بولەك، ۇلكەن جىلدامدىقپەن ۇشاتىن جانە ۇلكەن زيان كەلتىرۋى مۇمكىن ۇساق بولشەكتەر مەن قوقىستار قاۋىپ توندىرەدى.

ونىڭ الدىن الۋ جانە كەڭىستىكتى تازارتۋ ماقساتىندا اەنتتىك نولدىك قالدىقتار حارتياسىن قابىلدادى.

حارتيانىڭ ماقساتى - 2030 -جىلعا قاراي قاراۋسىز قالعان وربيتالىق اپپاراتتار سانىن نولگە دەيىن ازايتۋ. بۇل - جوعارى تالاپتارى بار، ورىندالۋى ءتيىس قۇجات.

ەۋروپالىق عارىش اكتىسى الداعى ايلاردا بريۋسسەلدە تانىستىرىلادى.

بۇل ە و- نىڭ جەرگە جاقىن كەڭىستىكتى بەيبىت يگەرۋگە قاتىسۋىن رەتتەيتىن ءبىرىنشى زاڭ بولماق.