ەرتىس وزەنىنىڭ تومەنگى ارناسى تازارتىلىپ جاتىر
پاۆلودار. KAZINFORM - ەرتىس وزەنىنىڭ پاۆلودار وبلىسىنداعى اۋماعىنىڭ ءبىر بولىگى تازارتىلىپ جاتىر. ناتيجەسىندە سۋ ايدىنىنىڭ ەكوجۇيەسى جاقسارىپ، بيوونىمدىلىگىن ارتتىرۋعا مۇمكىندىك بەرەدى دەپ كۇتىلىپ وتىر.
پاۆلودار وبلىسى ەرتىس اۋدانىندا ەرتىس وزەنىنىڭ ارنالارىن تازارتۋ جوباسى بويىنشا جۇمىستار باستالدى. وڭىرلىك جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسىنىڭ قىزمەتكەرلەرى جۋىقتا اتالعان اۋماققا بارىپ، جوبانىڭ بارىسىمەن تانىستى.
«جوبانى ىسكە اسىرۋ سۋ رەجيمىنىڭ اعىمدىلىعىن ارتتىرۋعا جانە وزەن اتىرابىنداعى ەكوجۇيەلەردى جاقسارتۋعا، سۋارمالى جەرلەردى ۇزدىكسىز سۋارمالى سۋمەن قامتاماسىز ەتۋگە، شالعىندى ءشوپ ماسساسىن جانە ەرتىس وزەنىنىڭ جايىلماسىنىڭ بيوونىمدىلىگىن ارتتىرۋعا مۇمكىندىك بەرەدى. جۇمىستاردى 2025 -جىلى اياقتاۋ جوسپارلانىپ وتىر»، - دەپ حابارلادى وڭىرلىك جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسىنان.
ەسكە سالا كەتەيىك، ەرتىس گيدرومەتاللۋرگيا كومبيناتى ەرتىس وزەنىنە 3 مىڭعا جۋىق ءسىبىر بەكىرەسىن جىبەردى.
اۆتور
مۇرات اياعان
