ەرتىس ورمانىندا قۇستاردىڭ قانشا ءتۇرى بار
پاۆلودار. قازاقپارات - 2025 -جىلى رەزەرۆاتتىڭ عىلىم، اقپارات جانە مونيتورينگ ءبولىمى جۇرگىزگەن دالالىق زەرتتەۋلەر ناتيجەسىندە رەزەرۆات اۋماعىندا بۇرىن تىركەلمەگەن 40 قۇس ءتۇرى انىقتالعان. ولاردىڭ ىشىندە پاۆلودار وبلىسى بويىنشا العاش رەت تىركەلگەن تۇرلەر دە بار.
«ەرتىس ورمانى» مەملەكەتتىك تابيعي رەزەرۆاتى - ەلىمىزدەگى بيوالۋانتۇرلىلىگى جوعارى جانە عىلىمي ماڭىزى زور اۋماقتاردىڭ ءبىرى. قازىرگى تاڭدا مۇندا قۇستاردىڭ 90 ءتۇرى تىركەلگەن. ونىڭ ىشىندە 10 ءتۇرى قازاقستان رەسپۋبليكاسىنىڭ قىزىل كىتابىنا ەنگىزىلگەن. سونداي-اق وسىمدىكتەردىڭ 307 ءتۇرى مەن سۇتقورەكتىلەردىڭ 21 ءتۇرى انىقتالعان.
- بىلتىر عىلىم، اقپارات جانە مونيتورينگ ءبولىمىنىڭ ماماندارى زەرتتەۋ جۇرگىزە كەلىپ، قاراعاي اراسىندا بۇرىن بولماعان 40 قۇس ءتۇرىن انىقتادى. ولاردىڭ ىشىندە كادىمگى جىلانجەگىش (Circaetus gallicus)، ەمەنتۇمسىق (Coccothraustes coccothraustes)، ازيالىق قاراباس شاقشاق (Saxicola maurus)، قىزىلقۇلاق سۇلىكەش (Emberiza cioides) تۇرلەرى بار. ءبىرازى بۇعان دەيىن ەرتىس-بايان وڭىرىندە ۇشىراسپاعان، العاش تىركەلىپ وتىر، - دەپ حابارلادى رەزەرۆاتتان.
رەزەرۆات باسشىلىعى الداعى ۋاقىتتا دا جۇيەلى مونيتورينگ جۇمىستارىن جالعاستىرا بەرەتىندەرىن حابارلادى. تابيعي بايلىقتى ساقتاۋ مەن قورعاۋدا «ەرتىس ورمانىنىڭ» الاتىن ورنى ايرىقشا.
بۇعان دەيىن ەرتىس ورمانىنا تۇلكىلەر قايتا ورالىپ جاتقانىن جازعانبىز.
