«ەرتىس ورمانىندا» 2029 -جىلعا دەيىن اعاش كەسۋگە تىيىم سالىندى

پاۆلودار. KAZINFORM - «ەرتىس ورمانى» تابيعي رەزەرۆاتىندا 2029-جىلعا دەيىن اعاشتىڭ بارلىق ءتۇرىن كەسۋگە تىيىم سالىندى. بۇل تۋرالى ورمان شارۋاشىلىعى جانە جانۋارلار دۇنيەسى كوميتەتىنىڭ ارنايى بۇيرىعى شىقتى.

ق ر ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ 10-قىركۇيەكتەگى 27-03/249-ن ق بۇيرىعىمەن «ەرتىس ورمانى» مەملەكەتتىك ورمان تابيعي رەزەرۆاتى اۋماعىندا اعاش كەسۋدىڭ بارلىق تۇرىنە تىيىم سالىندى.

«وسى بۇيرىق قولدانىسقا ەنگىزىلگەن كۇننەن باستاپ 2029 -جىلعى 1-قاڭتارعا دەيىن «ەرتىس ورمانى» مەملەكەتتىك ورمان تابيعي رەزەرۆاتى رەسپۋبليكالىق مەملەكەتتىك مەكەمەسىنە مەملەكەتتىك ورمان قورى ۋچاسكەلەرىندەگى ەكپەلەردە ورمان كەسۋدىڭ بارلىق تۇرلەرىنە (ءوتىمدى قوقىستاردى جيناۋدان، تىلمەلەردى كەسۋدەن جانە ورمان كۇتىمىن كەسۋدەن باسقا) تىيىم سالۋ ەنگىزىلسىن»، - دەلىنگەن قۇجاتتا.

پاۆلودار وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسى اتالعان بۇيرىقتىڭ ورىندالۋىن باقىلاۋدى قامتاماسىز ەتەدى.

«ەرتىس ورمانى» رەزەرۆاتى شالداي جانە بەسقاراعاي ورمان شارۋاشىلىقتارىنان، ونىڭ ىشىندە 16 ورمانشىلىقتان تۇرادى. ورمان جامىلعىسىنىڭ جالپى اۋماعى 177 مىڭ گەكتار. قورعالۋى جاعىنان اسا قۇندى ورمان القاپتارى ساناتىنا جاتادى. 2023 -جىلى پروكۋراتۋرا رەزەرۆات اۋماعىنان 331 تەكشە مەتر كولەمىندە زاڭسىز اعاش كەسىلگەنىن انىقتادى.

ەسكە سالا كەتەيىك، جىل باسىندا «ەرتىس ورمانى» باسشىسى پارا الدى دەگەن كۇدىكپەن قاماۋعا الىندى.

كەيىن ەرتىس ورمانىن وتاپ ساتقان باس ديرەكتور 150 ميلليون تەڭگە زالال اكەلگەنى انىقتالدى.

بۇعان دەيىن رەزەرۆات اۋماعىنداعى ەسكى ستانسالار مەن تەحنيكالاردىڭ ماسەلەسى تۋرالى تالداپ جازعان ەدىك.