ەرتىس ورماندارىندا ءساۋىر ايىنان باستاپ ءورتتى ەرتە انىقتاۋ جۇيەسى ىسكە قوسىلادى
پاۆلودار. KAZINFORM - بۇل ماقساتقا بيۋدجەتتەن 900 ميلليون تەڭگە بولىنگەن. قازىرگى ۋاقىتتا «ەرتىس ورمانى» رەزەرۆاتى اۋماعىندا 23 بيىك مۇنارا تۇرعىزىلىپ، قاجەتتى جابدىقتار ورناتىلدى.
ورمان ورتتەرىن ەرتە انىقتاۋ جۇيەسى - بۇل ورمان مونيتورينگىنە ارنالعان باعدارلامالىق- اپپاراتتىق كەشەن. ول شۇعىل تۇردە ءىس- شارالاردى قابىلداۋعا جانە ءورت قاۋىپتىلىگى جوعارى ماۋسىمىندا ورمان ورتتەرىنەن بولاتىن زالالدى ايتارلىقتاي ازايتۋعا مۇمكىندىك بەرەدى.
مامانداردىڭ ايتۋىنشا، ءورتتى انىقتاۋ تاۋلىك بويى 360 گرادۋسقا قارايتىن جانە 30 ك م- گە دەيىنگى راديۋستا جاعدايدى تىركەيتىن بەينەباقىلاۋ كامەرالارىنىڭ كومەگىمەن جۇزەگە اسىرىلادى. باقىلاۋ اۋماعى 10 مىڭ گەكتارعا دەيىن جەتەدى.
قازىرگى ۋاقىتتا «ەرتىس ورمانى» رەزەرۆاتىنىڭ اۋماعىندا 23 بيىك مۇنارا مەن وعان قاجەتتى كەشەندەر تۇرعىزىلدى. ونداعى بەينەكامەرالار تەپلوۆيزورمەن جاراقتالعاندىقتان ءورتتى تۇندە دە انىقتاۋدىڭ مۇمكىندىگى بار. بۇعان قوسا، نايزاعاي تۇسكەن جەرلەردى كامەرالار كورسەتىپ، بەلگى بەرەدى. جۇيەنى باسقارۋدى قامتاماسىز ەتۋ ورتالىعىنىڭ (ب ق و) ماماندارى قازىرگى ۋاقىتتا وقىتىلىپ جاتىر. 8-ساۋىردە جۇيە تولىققاندى جۇمىس ىستەي باستايدى.
رەزەرۆاتتىڭ باس ديرەكتورىنىڭ مىندەتىن اتقارۋشى قازبەك امەتوۆتىڭ ايتۋىنشا، جاڭا قۇرىلعىلار ارقىلى الداعى ۋاقىتتا مەملەكەتتىك ورمان قورىنا جاتاتىن 277,9 مىڭ گەكتار اۋماقتى تاۋلىك بويى تولىق باقىلاپ وتىرۋدىڭ مۇمكىندىگى تۋادى.
«جاڭا جۇيەنىڭ كومەگىمەن ورمان ورتتەرىن ۋاقىتىلى انىقتاپ قانا قويماي، سونىمەن قاتار ورمان زاڭناماسىنىڭ بۇزىلۋىن دا انىقتاۋعا بولادى. سەبەبى جۇيە تاۋلىك بويى بەينەتۇسىرىلىم جۇرگىزىپ، ونلاين رەجيمدە ب ق و- عا سيگنال تاراتىپ تۇرادى. مىسالى، تۇنگى ۋاقىتتا ورمان اراسىندا تەحنيكا قوزعالىسى بايقالسا، كامەرالار بۇل قۇبىلىس جايىندا بىردەن باسقارۋ ورتالىعىنداعى مامانعا حابار بەرەدى. «ءولى ايماقتار» بولماۋى كەرەك. نەگىزىنەن ءورت تۋىنداي قالعاندا قاۋىپتىلىگى اسا جوعارى بولاتىن ورمان تەلىمدەرى تاڭدالدى. مۇنارالارعا بەكىتىلگەن انتەننا- ماتچتالار رەزەرۆاتتىڭ بارلىق اۋماعىن باقىلاۋدا ۇستاپ تۇراتىنداي ەتىپ ورنالاسقان. مۇنارا كەشەندەرىنىڭ اۋماعى تەمىر دۋالمەن قورشالعان. بۇل مۇنارالاردىڭ باسىندا تەك تەپلوۆيزورلى كامەرالار عانا ەمەس، مەتەورولوگيالىق مونيتورينگ جۇرگىزەتىن جانە نايزاعايلاردىڭ ءتۇسۋىن تىركەيتىن جۇيەلەر دە ورناتىلعانىن ەسكەرۋ كەرەك. جۇيەگە بۇدان بولەك قوسىمشا قۇرال رەتىندە GPS- ترەكەرلەر دە ەنەدى. ولاردى ءبىز ءورت ءسوندىرۋ تەحنيكالارى مەن پاترۋلدىك اۆتوكولىكتەرگە ورناتامىز. سول ارقىلى ءورتتىڭ ناقتى قاي جەردە بولعانىن جەدەل انىقتاپ، كۇشتى جەدەل جۇمىلدىرۋعا بولادى. بۇدان بولەك ۇشقىشسىز باسقارىلاتىن اپپاراتتار دا كەشەن جۇيەسىنە ەنەدى»، - دەدى ق. امەتوۆ.
اتاپ وتەرلىگى، 23 مۇنارانىڭ جابدىقتارى كۇن پانەلدەرى ارقىلى وندىرىلگەن ەلەكتر ەنەرگياسىنان قۋاتتالادى. ءار كەشەندە ديزەلدى گەنەراتورلار دا ورناتىلعان. كۇن پانەلدەرىنەن كىنارات شىققان جاعدايدا، گەنەراتورلار ىسكە قوسىلادى.
