ەرتىس پەن زايسانعا 30 ميلليون شاباق جىبەرىلدى
استانا. قازاقپارات - شىعىس قازاقستان وبلىسىنداعى سۋ ايدىندارىنا 30 ميلليوننان استام شاباق جىبەرىلدى، دەپ حابارلايدى 24KZ.
ەرتىس پەن زايساندا جارتى عاسىر بۇرىن جويىلىپ كەتكەن بەكىرە، فورەل جانە اق امۋر سەكىلدى بالىق تۇرلەرى كوبەيتىلەدى. اۋقىمدى جۇمىس مەملەكەتتىك تاپسىرىس اياسىندا جۇزەگە استى. زايسان-ەرتىس باسسەينىن بالىقتاندىرۋعا شامامەن 200 ميلليون تەڭگە ءبولىندى. ال بۇقتىرما مەن وسكەمەن سۋ قويمالارىنا بالىق جىبەرۋدى شارۋاشىلىقتار مەن سۋ ەلەكتر ستانسيالارى ءوز مىندەتىنە الىپ، 60 ميلليون تەڭگەگە جۋىق قاراجات جۇمساعان. بالىقتاردىڭ سۋعا بەيىمدەلۋىن عىلىمي-زەرتتەۋ ينستيتۋتتارىنىڭ عالىمدارى باقىلايدى. ال ينسپەكتورلار زاڭسىز بالىق اۋلاۋعا قارسى كۇرەستى كۇشەيتەتىن بولدى.
مامانداردىڭ ايتۋىنشا، بۇل شارالار بالىق قورىن كوبەيتىپ قانا قويماي، ءوڭىردىڭ ەكوجۇيەسىن قالپىنا كەلتىرۋگە وڭ اسەرىن تيگىزەدى.
گۇلنار قوناربايەۆا، «زايسان- ەرتىس» وبلىسارالىق باسسەيندىك بالىق شارۋاشىلىعى ينسپەكسياسى ءبولىمىنىڭ باسشىسى:
- 2024 -جىلعا دەيىن ءبىز تۇقى تۇقىمداس بالىق تۇرلەرىن عانا جىبەرىپ كەلدىك. بيىل العاش رەت شارۋاشىلىقتارعا وسى باعىتتان ءسال اۋىتقىپ، باعالى بالىق تۇرلەرىمەن بالىقتاندىرۋدى ۇسىنىپ وتىرمىز. بيىل وسكەمەن سۋ ەلەكتر ستانسياسى مەن «قازاقستان سۋ جولدارى» كاسىپورنىنىڭ سەمەي فيليالى بەكىرە تۇقىمداس بالىق شاباقتارىن سۋ ايدىندارىنا جىبەردى.
