رەسەيدەن يمپورتتالاتىن بەنزين باعانى كوتەرمەي مە - مينيسترلىك جاۋابى

ەنەرگەتيكا مينيسترلىگى ەلدەگى اي-92 ماركالى بەنزيننىڭ تاپشىلىعىن بولدىرماۋ ءۇشىن رەسەيدەن 110 مىڭ توننا ءونىم جەتكىزۋ تۋرالى كەلىسسوز جۇرگىزىپ جاتىر.

ۆيتسە-مينيستر ەرلان اقكەجەنوۆ بۇل بەنزين كەلسە، ىشكى نارىقتاعى باعاعا اسەرى قانداي بولاتىنىن ايتتى، دەپ حابارلايدى قازاقپارات ءتىلشىسى.

«اي-92 ماركالى بەنزيننىڭ باعاسىن وزگەرتۋدى جوسپارلاپ وتىرعان جوقپىز. اي-95 ءتىڭ دە باعاسىن وزگەرتۋ جوسپاردا جوق. بەنزين باعاسى تۋرالى جالپى ايتساق، اي-92 ءنىڭ باعاسىن مەملەكەت رەتتەيدى. قازىر شەكتى باعا 1 ليترگە 205 تەڭگەگە دەيىن.

ال اي-95 ماركالى بەنزين باعاسىن مەملەكەت رەتتەمەيدى. ونى نارىق ءوزى رەتتەيدى. سوندىقتان ويىنشىلار ونىڭ باعاسىن ءوز بەتتەرىمەن قويۋعا حاقىلى. ءبىراق ءبىر ولشەم بار. بۇل - تاۋاردىڭ وزىندىك قۇنى. ياعني، باعا بەلگىلەۋ ەرەجەسى بويىنشا، باسەكەلەستىكتى قورعاۋ جانە دامىتۋ اگەنتتىگى باعانى قاراعان كەزدە وزىندىك قۇن بويىنشا باعالايدى. قازاقستاندا وندىرىلگەن بەنزيننىڭ وزىندىك قۇنى بىزگە انىق. ونى بىزدە «قازمۇنايگاز» جانە «Petrosun» كومپانيالارى مەن ونىڭ ەنشىلەس كاسىپورىندارى، وزگە دە تاۋەلسىز مۇناي وڭدەۋشىلەر شىعارادى»، - دەدى ول.

ۆيتسە-مينيستر رەسەيدەن اكەلىنەتىن بەنزيننىڭ باعاسى قانداي بولاتىنىن ايتۋعا ءالى ەرتە دەپ وتىر.

«رەسەي بەنزينى تۋرالى ايتقاندا ونىڭ جەتكىزۋ قۇنى مەن وزىندىك قۇنىن ەسەپتەۋىمىز كەرەك. بۇل جەردە كەلىسىمشارت بەكىتىلگەن كۇنگە قاراپ، وعان بىزدە سالىناتىن الىم-سالىقتاردى قوسۋ كەرەك.

قازىرگى تاڭدا رەسەي بيرجاسىندا بەنزين باعاسى كۇن سايىن وزگەرىپ تۇر. قازىر تومەندەي باستادى. وزىندىك قۇنىن ايتساق، 390-400 تەڭگە توڭىرەگىندە بولۋى مۇمكىن. ءبىراق بۇل شامالاپ العانداعى كورسەتكىش قانا. ناقتى قاتىپ قالعان ولشەم ەمەس. ايتسە دە، بىزگە كەلەتىن رەسەي بەنزينى وزىندىك قۇنىنان تومەن بولمايدى. ويتكەنى ولاردىڭ وزدەرىنىڭ ساتۋ باعاسى بار. وعان ءبىزدىڭ الىم-سالىقتار مەن تاسىمال شىعىندارىن قوسۋ كەرەك.

دەگەنمەن قولداعى بار قوردى ەسەپتەپ، قازاقستان كۇزدى جانارماي تاپشىلىعىنسىز وتكىزەدى دەپ ۇمىتتەنەمىز»، - دەگەن ەرلان اقكەنجەنوۆ بۇعان دەيىنگى تاجىريبەنى مىسالعا الدى.

ايتۋىنشا، رەسەي بەنزينى قازاقستان بەنزينىنەن قىمبات بولعانىنا قاراماستان، تۇگەل ساتىلىپ كەتكەن كورىنەدى.

«گازپروم» كومپانياسى الماتىعا اكەلگەن اي-95 ماركالى بەنزيننىڭ باعاسى ليترىنە 298 تەڭگە بولدى، مەن قاتەلەسپەسەم. ول كەزدە قازاقستان بەنزينىنىڭ باعاسى 250 تەڭگە بولعان. سوعان قاراماستان، رەسەي بەنزينى تولىعىمەن ساتىلىپ كەتتى. ويتكەنى ولاردىڭ بەنزينىنە جانارماي جولدارىن تازارتاتىن قوسپا قوسىلعان. بۇل كولىكتى جاقسى جۇرگىزەتىن كورىنەدى.

قايتالاپ ايتام، قازاقستان بەنزينىنىڭ باعاسىن كوتەرمەيمىز. مينيسترلىك قازىرگى باعا وسى كۇيىندە قالۋ ءۇشىن بۇكىل شارانى قابىلدادى»، - دەدى ءمينيستردىڭ ورىنباسارى.