رەسەيدەن ەلەكتر قۋاتىن قىمباتقا الىپ وتىرمىز - ەنەرگەتيكا ءمينيسترى
استانا. KAZINFORM - ماجىلىستە ەلەكترمەن جابدىقتاۋ جۇيەسىن جەتىلدىرۋگە ارنالعان جيىن ءوتىپ جاتىر. وسى جيىندا ەنەرگەتيكا ءمينيسترى ەرلان اقكەنجەنوۆ تاپشىلىق سالدارىنان قازاقستان رەسەيدەن توقتى اسا قىمبات باعاعا ساتىپ الىپ وتىرعانىن ايتتى.
- ءبىز قازىر ەلەكتر ەنەرگياسىنىڭ دەفيتسيتى بارىن مويىنداۋىمىز كەرەك. ەكى جىل بۇرىن ءدال قازىرگىدەي قاجەتتىلىك قاتتى سەزىلمەيتىن. بۇگىنگى تاڭدا ساعاتىنا 2 ميلليارد كۆت- قا دەيىن جەتپەي جاتادى. ءبىز ونى رەسەي تاراپىنان ساتىپ الىپ وتىرمىز. شىن مانىندە، ساتىپ الۋ قۇنى كەيدە تىپتەن وتە جوعارى بولىپ كەتەدى. سەبەبى ءبىز كەي جاعدايدا توق ەڭ كوپ قاجەتتى كەزەڭدە ساتىپ الىپ جاتامىز. باعا دا سول سەبەپتەن ارتىپ كەتە بەرەدى. باعا كەلەشەكتە تىپتەن جوعارى بولىپ كەتپەۋ ءۇشىن ءوز گەنەراتسيامىزدى دامىتۋ كەرەك. ينۆەستور بولماسا، مەملەكەت تاعى دا ۇلتتىق قورعا جۇگىنەدى. ونىڭ ۇستىنە جوبا ۇلكەن كاپيتالدى قاجەت ەتەدى. جاڭا ەنەرگەتيكالىق بلوكتاردى سالۋ ءۇشىن 700-800 ميلليون دوللاردان 1 ميلليارد دوللارعا دەيىن قاراجات كەرەك. 2 ميلليارد كۆت قاجەتتىلىكتى جابۋ ءۇشىن بىزگە قۋاتى 540 مۆت بولاتىن 3-4 بلوكتى ىسكە قوسۋىمىز كەرەك. وسىنشا سومانى ۇلتتىق قوردان الىپ جاتساق نە بولاتىنىن ەسەپتەي بەرىڭىز، - دەدى مينيستر.
سونداي-اق، قازىر الەمدىك نارىقتا ينۆەستيتسياعا تالاس قاتتى ەكەنىن ايتتى.
-قازىر بۇكىل الەم ينۆەستيتسيالار ءۇشىن كۇرەسىپ جاتىر. وزبەكستاندا ينۆەستيتسيا تارتۋ ءۇشىن ءار جوباعا مەملەكەت باسشىسىنىڭ قولى قويىلادى. ينۆەستيتسيالاردى تارتۋ ءىسىن ولار سونداي دەڭگەيگە دەيىن كوتەرىپ تاستادى. پرەزيدەنتتىڭ ءوزى بۇل ماسەلەگە ءجىتى نازار اۋدارادى. ال بىزدە جاۋاپكەرشىلىك ءار مينيستردە. سول سەبەپتى ەنەرگەتيكا سياقتى كاپيتالدى قاجەت ەتەتىن ينۆەستيتسيا تارتۋدىڭ ماڭىزى زور دەپ ەسەپتەيمىز، - دەيدى ەرلان اقكەنجەنوۆ.
سونداي-اق، وتكەن اپتادا ەنەرگەتيكا مينيسترلىگى ەكىباستۇزدا جاڭا ەلەكتر ستانتسياسىن سالۋعا تەندەر جاريالاعان ەدى.
اۆتور
ەسىمجان ناقتىباي
