رەسەيدە ميگرانتتارعا زەينەتاقى تولەۋدى توقتاتۋ ۇسىنىلدى
استانا. KAZINFORM - رەسەي ليبەرالدىق-دەموكراتيالىق پارتياسى (ل د پ ر) جەتەكشىسى لەونيد سلۋتسكي فەدەرالدىق بيۋدجەتكە تۇسەتىن قىسىمدى ازايتۋ ءۇشىن رەسەيدە تۇراقتى تۇراتىن شەتەلدىك ازاماتتاردىڭ الەۋمەتتىك زەينەتاقىسىن الىپ تاستاۋ كەرەكتىگىن ايتتى، دەپ حابارلايدى Gazeta.ru.
- رەسەي قازىرگى ۋاقىتتا جاۋاپتى كەزەڭدى باستان وتكەرىپ جاتىر. ارنايى اسكەري وپەراتسيالار، الەۋمەتتىك، دەموگرافيالىق جانە باسقا دا ماسەلەلەر - مۇنىڭ ءبارى قوماقتى قاراجاتتى قاجەت ەتەدى. مۇندا ءاربىر تيىن ماڭىزدى! - دەدى پارلامەنت مۇشەسى.
سلۋتسكي ەلدىڭ دامۋىنا اتسالىسپاعان شەتەلدىكتەردىڭ زەينەتاقى الۋعا قۇقىعى بار ەكەنىنە تاڭدانىسىن ءبىلدىردى. ول رەسەيلىك زەينەتكەرلەر از مولشەردە اقشا السا، كەيبىر «رەسەيدى جەك كورەتىن» شەتەل ازاماتتارى الەۋمەتتىك قولداۋ الاتىنىن اتاپ ءوتتى.
ليبەرالدىق-دەموكراتيالىق پارتيا جەتەكشىسىنىڭ پىكىرىنشە، ميگرانتتارعا تولەنەتىن الەۋمەتتىك تولەمدەر نەگىزسىز جانە ونى توقتاتۋ كەرەك. پارتيا مۇنداي تولەمدەردى الىپ تاستاۋ زەينەتاقى جۇيەسىنە جانە جالپى بيۋدجەتكە تۇسەتىن سالماقتى ازايتۋعا سەپتىگىن تيگىزەدى دەپ ەسەپتەيدى.
سلۋتسكي ۇسىنعان مالىمەتتەرگە سايكەس، 2024 -جىلى رەسەيدەگى كوشى-قوننىڭ ءوسۋى شامامەن 600 مىڭ ادامدى قۇرايدى - بۇل سوڭعى 30 جىلداعى ەڭ جوعارى كورسەتكىش.
باستامانىڭ تۇسىندىرمە حاتىندا ۇسىنىلىپ وتىرعان وزگەرىستەر زەينەتاقى جۇيەسىن شەكتەن تىس مىندەتتەمەلەردەن قورعاۋعا باعىتتالعانى ايتىلعان.
قولدانىستاعى رەسەي زاڭناماسىنا سايكەس، شەتەل ازاماتتارى مەن ازاماتتىعى جوق ادامدار ەلدە كەمىندە 15 جىل تۇراقتى تۇرىپ، زەينەتكەرلىك جاسقا جەتكەن جاعدايدا (ەرلەر ءۇشىن 70 جانە ايەلدەر ءۇشىن 65) زەينەتاقى الۋعا قۇقىلى.
2024 -جىلعى 1-قىركۇيەكتەگى كوشى-قون ستاتيستيكاسى بويىنشا رەسەيدەدە 6,1 ميلليوننان استام شەتەل ازاماتى تىركەلگەن.
ەسكە سالا كەتەيىك، وزبەكستان ءارتىسىنىڭ رەسەيدەگى كونسەرتىنەن كەيىن بىرنەشە ادام تۇتقىندالدى.
