رەسەيدە ميگرانتتار ءۇشىن جاڭا مەملەكەتتىك باج سالىعى ەنگىزىلەدى
استانا. KAZINFORM - رەسەي پرەزيدەنتى ۆلاديمير پۋتين زاڭعا قول قويدى، وعان سايكەس 2025 -جىلدىڭ 1 -قىركۇيەگىنەن باستاپ ميگرانتتار ءۇشىن جاڭا مەملەكەتتىك باج سالىعى ەنگىزىلىپ، بۇرىنعىلارى ۇلعايتىلادى، دەپ حابارلايدى Kazinform.
رەسەيگە اقشا تابۋ ماقساتىندا كەلگەن شەتەلدىكتەر پاتەنتتى بەرۋ نەمەسە قايتا راسىمدەۋ، سونداي-اق جۇمىس ىستەۋگە رۇقساتتىڭ مەرزىمىن ۇزارتۋ ءۇشىن 4200 رۋبل (شامامەن 28 مىڭ تەڭگە) سالىق تولەۋگە مىندەتتى بولادى.
سونىمەن قاتار، 1-قىركۇيەكتەن باستاپ شەتەلدىك ازاماتتى تۇرعىلىقتى جەرى بويىنشا تىركەۋ ءۇشىن الىناتىن مەملەكەتتىك باج سالىعى 1000 رۋبلگە دەيىن (شامامەن 6700 تەڭگە) كوتەرىلەدى، ال تۇرعىلىقتى ورنى بويىنشا تىركەۋ ءۇشىن مەملەكەتتىك باج سالىعى 500 رۋبل (شامامەن 3300 تەڭگە). ەلدە ۋاقىتشا بولۋ مەرزىمىن ۇزارتۋ ءۇشىن 1000 رۋبل (شامامەن 6700 تەڭگە) باج سالىعى قاراستىرىلعان.
بۇل شارالار شەتەلدىكتەردىڭ رەسەيدە بولۋىن باقىلاۋدى كۇشەيتۋگە كومەكتەسەدى، سونداي- اق مەملەكەتتىك ورگاندارعا پاتەنتتى تىركەۋگە جانە بەرۋگە بايلانىستى ناقتى شىعىنداردى وتەۋگە مۇمكىندىك بەرەدى.
بۇدان بولەك، بيلىك مەملەكەتتىك باج سالىعىن جاڭارتۋ ميگرانتتاردى قۇجاتتار مەن ولاردىڭ جارامدىلىق مەرزىمدەرىنە جاۋاپكەرشىلىكتى ارتتىرۋعا يتەرمەلەيدى دەپ كۇتىپ وتىر.
بۇعان دەيىن رەسەيدىڭ ەڭبەك مينيسترلىگى زاڭ جوباسىنا تۇزەتۋلەر ەنگىزگەنىن جازعان بولاتىنبىز. وعان سايكەس جۇرگىزۋشى، ساتۋشى جانە مەديتسينا قىزمەتكەرى لاۋازىمدارىنا قابىلداناتىن ميگرانتتار ورىس ءتىلى مەن ورىس تاريحىن ءبىلۋ بويىنشا تەست تاپسىرۋ تالابىنان بوساتىلمايدى.
