رەسەيدە جولاۋشىلار ۇشاعى اپاتقا ۇشىرادى

استانا. KAZINFORM - رەسەي فەدەراتسياسىنىڭ امۋر وبلىسىندا جولاۋشىلار ۇشاعى اپاتقا ۇشىرادى، دەپ حابارلايدى ت ا س س اقپارات اگەنتتىگى.

امۋر وبلىسىندا ا ن-24 ۇشاعىنىڭ قۇلاعان جەرى انىقتالدى.

- جەدەل- ىزدەستىرۋ شارالارى بارىسىندا رەسەي اۆياتسياسىنىڭ مي-8 تىكۇشاعى ۇشاقتىڭ فيۋزەلياجىن انىقتادى، ءورت شىعىپ جاتىر. قۇتقارۋشىلار وقيعا ورنىنا بارۋدى جالعاستىرىپ جاتىر، - دەپ حابارلادى ت ا س س اگەنتتىگىنە ر ف ت ج م باسپا ءسوز قىزمەتى.

ان-24 ۇشاعىنىڭ سىنىقتارى تىندادان 16 شاقىرىم جەردەگى تاۋ باۋرايىنان انىقتالدى، دەپ حابارلادى امۋر ازاماتتىق قورعانىس جانە ءورت قاۋىپسىزدىگى ورتالىعى.

امۋر وبلىسىندا جوعالعان ان-24 جولاۋشىلار ۇشاعى تىندا اۋەجايىنا قونۋعا ەكىنشى اينالىمنان كەيىن بايلانىسقا شىقپاي قويعان.

- الدىن الا مالىمەت بويىنشا، بۇگىن ساعات 13:00 شاماسىندا (ماسكەۋ ۋاقىتىمەن 07:00 - ت ا س س) حاباروۆسك - بلاگوۆەشەنسك - «انگارا» ا ە ك كومپانياسىنىڭ (يركۋتسك) تىندا باعىتى بويىنشا ۇشىپ كەلە جاتقان ان-24 ۇشاعىنىڭ ەكيپاجىمەن بايلانىس ۇزىلگەن. تىندا اۋەجايىنا قونۋعا ەكىنشى رەت جاقىنداعان كەزدە ۇشاق ەكىنشى قونۋعا بەت الدى، سودان كەيىن ونىمەن بايلانىس ءۇزىلدى. اۋە كەمەسىنىڭ ورنالاسقان جەرى انىقتالعان جوق، ىزدەستىرۋ-قۇتقارۋ وپەراتسياسى ۇيىمداستىرىلدى، - دەلىنگەن قيىر شىعىس كولىك پروكۋراتۋراسىنىڭ حابارلاماسىندا.

وقيعانىڭ ءمان-جايى انىقتالىپ جاتىر. تىندا كولىك پروكۋراتۋراسى بايكال-انگارا كولىك پروكۋراتۋراسىمەن بىرلەسىپ ۇشۋ قاۋىپسىزدىگى زاڭناماسىنىڭ ساقتالۋىنا تەكسەرۋ ۇيىمداستىردى.

امۋر وبلىسىنىڭ گۋبەرناتورى ۆاسيلي ورلوۆتىڭ ءوزىنىڭ Telegram-ارناسىندا حابارلاعانىنداي، الدىن الا مالىمەت بويىنشا، ۇشاقتا 43 جولاۋشى، ونىڭ ىشىندە 5 بالا مەن 6 ەكيپاج مۇشەسى بولعان.

اۆتور

زارينا تۋعانبايەۆا