رەسەيدە شەتەلدىكتەر بايلانىسسىز قالۋى مۇمكىن
ماسكەۋ. قازاقپارات – 1-شىلدەدەن باستاپ رەسەيدە بيومەتريالىق دەرەكتەرىن تاپسىرماعان شەتەل ازاماتتارىنىڭ ۇيالى بايلانىسى وشىرىلە باستايدى، دەپ حابارلايدى Kazinform اگەنتتىگىنىڭ ءتىلشىسى.

بۇل تۋرالى رەسەيدىڭ سيفرلىق دامۋ، بايلانىس جانە بۇقارالىق كوممۋنيكاتسيالار مينيسترلىگى مالىمدەدى.
حابارلامادا ايتىلعانداي، بيىلدان باستاپ شەتەلدىك ازاماتتار بايلانىس وپەراتورلارىمەن كەلىسىمشارتتى تەك ءبىرىڭعاي بيومەتريالىق جۇيەگە (ب ب ج) تىركەلگەن جاعدايدا عانا جاساي الادى. ولارعا ءوز اتىنا 10 س ي م- كارتاعا دەيىن راسىمدەۋگە رۇقسات ەتىلگەن.
بۇرىن جاسالعان كەلىسىمشارتتار بويىنشا بيومەتريانى تاپسىرۋ مەرزىمى 2025-جىلدىڭ 1-شىلدەسىندە اياقتالادى. وسى كۇنگە دەيىن تالاپتى ورىنداماعاندار ءۇشىن بايلانىس وپەراتورلارى كەزەڭ-كەزەڭىمەن ۇيالى بايلانىستى وشىرە باستايدى.
مينيسترلىكتىڭ مالىمەتىنشە، بۇگىندە 2 ميلليوننان استام شەتەلدىك ب ب ج- گە تىركەلىپ، جاڭا ەرەجەلەر بويىنشا كەلىسىمشارت جاساعان.
سونىمەن قاتار، 3 ايدان استام ۋاقىت بويى پايدالانىلماعان نومىرلەر بىردەن وشىرىلەدى. ال بەلسەندى نومىرلەر بويىنشا بايلانىس بىرتىندەپ شەكتەلەدى: الدىمەن حالىقارالىق جانە قالاارالىق قوڭىراۋلار بۇعاتتالادى، ينتەرنەت جىلدامدىعى تومەندەيدى، ال 30 كۇننەن كەيىن بايلانىس قىزمەتتەرى تولىق توقتاتىلادى. وسى مەرزىم ىشىندە كەلىسىمشارتتى جاڭا ەرەجەلەر بويىنشا قايتا راسىمدەۋگە بولادى.
بۇدان بولەك، 30-ماۋسىمنان باستاپ رەسەيگە كەلۋدى جوسپارلاپ وتىرعان شەتەلدىكتەر ruID قوسىمشاسى ارقىلى ەلگە كىرۋ تۋرالى ءوتىنىم بەرىپ، وندا بيومەتريالىق دەرەكتەرىن تىركەي الادى. شەكارادا سيفرلىق پروفيل قۇرىلادى، وندا جەكە شوتتىڭ ساقتاندىرۋ ءنومىرى جانە مەملەكەتتىك قىزمەتتەردەگى (رەسەيدەگى egov بالاماسى) تىركەۋلىك جازباسى كورسەتىلۋ كەرەك. پروفيل مەن بيومەتريانى راستاۋ ءۇشىن بانككە ءبىر رەت بارۋ جەتكىلىكتى. قايتادان سۋرەتكە ءتۇسىپ، داۋىس جازۋدىڭ قاجەتى جوق.
ەسكە سالا كەتەيىك، بيىل 1-قاڭتاردان باستاپ شەتەلدىكتەرگە س ي م- كارتا ساتىپ الۋ تارتىبىنە قوسىمشا تالاپتار ەنگىزىلدى. بايلانىس كەلىسىمشارتىن جاساۋ ءۇشىن شەتەلدىك ازامات جەكە شوتتىڭ ساقتاندىرۋ ءنومىرىن الىپ، مەملەكەتتىك قىزمەتتەر پورتالىندا تىركەلۋى ءتيىس، سونداي-اق بيومەتريانى تىركەپ، ءوز تەلەفونىنىڭ IMEI كودىن كورسەتۋى قاجەت.
ايتا كەتەلىك ەلىمىزدە س ي م- كارتالاردى ساتىپ الۋ كەزىندە بيومەتريالىق سايكەستەندىرۋ جۇيەسى ەنگىزىلىپ جاتقانى تۋرالى جازعان ەدىك.