رەسەيدە بيزنەستىڭ قارىزى ەكى ەسە ۇلعايدى
ماسكەۋ. KAZINFORM - رەسەيلىك بيزنەس تاراپىنان زەينەتاقى مەن مەديتسينالىق قىزمەتتەرگە بايلانىستى تولەمدەر بويىنشا قارىز كولەمى بىلتىرعى كورسەتكىشتەن ەكى ەسە اسىپ، 352 ميلليارد رۋبلگە (شامامەن 2 تريلليون 330 ميلليارد تەڭگە) جەتتى.
بۇل تۋرالى رەسەي فەدەراتسياسى ەسەپ پالاتاسىنىڭ ەسەبىندە ايتىلعان، دەپ حابارلايدى Kazinform اگەنتتىگىنىڭ ءتىلشىسى.
انىقتاما: رەسەيدەگى ساقتاندىرۋ جارنالارى - بۇل جۇمىس بەرۋشىلەردىڭ قىزمەتكەرلەرىنىڭ زەينەتاقى، مەديتسينا جانە الەۋمەتتىك قورعاۋىنا مىندەتتى تۇردە تولەيتىن تولەمدەرى. 2023-جىلدان باستاپ بيزنەس بۇل جارنالاردى ءبىرىڭعاي مولشەرلەمە بويىنشا - قىزمەتكەرگە تولەنەتىن جالاقىنىڭ %30 كولەمىندە اۋدارادى (ونىڭ ىشىندە %22 - زەينەتاقىعا، %5,1 مەديتسيناعا، %2,9 باسقا الەۋمەتتىك جاردەماقىلارعا).
رەسەيلىك ساراپشىلاردىڭ پىكىرىنشە، ساقتاندىرۋ جارنالارى بويىنشا بەرەشەكتىڭ وسۋىنە ەڭ الدىمەن بيزنەستىڭ قارجىلىق جاعدايىنىڭ ناشارلاۋى سەبەپ بولىپ وتىر. بۇل، اسىرەسە، شاعىن جانە ورتا بيزنەسكە ءتان، مۇندا اينالىم قاراجاتى ەڭ الدىمەن جالاقى، جالعا الۋ جانە تاۋار ساتىپ الۋ سياقتى شىعىندارعا جۇمسالادى، ال ساقتاندىرۋ جارنالارىنا جەتپەي قالادى.
ساراپشىلار رەسەيدە قاي ءوڭىر مەن ناقتى قاي سالادا ساقتاندىرۋ جارنالارى بويىنشا بەرەشەك كوپ ەكەندىگى تۋرالى اشىق مالىمەتتەر جوق دەيدى. ولار نەگىزگى قارىز قۇرىلىس، ساۋدا جانە قىزمەت كورسەتۋ سياقتى كولەڭكەلى جۇمىسپەن قامتۋ ۇلەسى جوعارى سالالاردا جينالعان بولۋى مۇمكىن دەپ بولجايدى.
ولاردىڭ پىكىرىنشە، مۇنداي تاۋەكەلدەر كومىر ونەركاسىبىندە دە جوعارى، ويتكەنى بۇل سالاعا سۇرانىستىڭ تومەندەۋى، سانكتسيالار مەن لوگيستيكالىق شەكتەۋلەر اسەر ەتىپ جاتىر. بۇل ەڭ الدىمەن ءىرى شاحتالار شوعىرلانعان كەمەروۆو وبلىسى، كراسنويار ولكەسى جانە حاكاسياعا قاتىستى.
سونىمەن قاتار، ساراپشىلار تۋريزم سالاسىندا دا وسىنداي جاعداي بولۋى مۇمكىن ەكەنىن اتاپ وتەدى.
ساراپشىلار بيىل ەكونوميكالىق ءوسىم قارقىنى باياۋلايدى دەپ بولجايدى. سونداي-اق كەيبىر سەكتورلاردا قۇلدىراۋ بولۋى مۇمكىن ەكەنىن ەسكەرتەدى. بۇل كومپانيالاردىڭ جاعدايىن قيىنداتىپ، جارنالاردى ۋاقتىلى تولەۋىن تەجەيدى.
بۇعان دەيىن رەسەيدە شەتەلدىكتەردىڭ بايلانىسسىز قالۋى مۇمكىن ەكەنىن حابارلاعان ەدىك.
