رەسەيدە اتا-انا قامقورلىعىنسىز قالعان وزبەكستاندىق 17 بالا وتانىنا ورالدى
تاشكەنت. KAZINFORM - رەسەي اۋماعىندا اتا-انا قامقورلىعىنسىز قالعان كامەلەتكە تولماعان وزبەكستاندىقتار وتانىنا قايتارىلدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
وزبەكستاننىڭ سىرتقى ىستەر مينيسترلىگىنە قاراستى «Dunyo» اقپارات اگەنتتىگىنىڭ مالىمەتىنشە، قۇزىرلى ورگان ماماندارىنىڭ كومەگىمەن رەسەيدە اتا-انا قامقورلىعىنسىز قالعان 17 بالا وتانىنا ورالدى. ولاردىڭ بارلىعى كامەلەت جاسىنا جەتپەگەندەر.
«وزبەكستاننىڭ رەسەيدەگى ەلشىلىگى بالالارعا تەگىن نەگىزدە وتانىنا ورالۋعا مۇمكىندىك بەرەتىن سەرتيفيكاتتار راسىمدەدى. كامەلەتكە تولماعاندار وزبەكستانعا كەلگەننەن كەيىن تۋىستارىنا بەرىلەدى جانە مەملەكەتتىك ارنايى بالالار مەكەمەلەرىنە ورنالاستىرىلادى»، - دەپ ءمالىم ەتتى «Dunyo» اگەنتتىگىنەن.
ايتا كەتەيىك، وزبەكستاننىڭ ديپلوماتيالىق مەكەمەلەرى شەتەلدە اتا-انا جانە زاڭدى وكىلدەرىنىڭ قاراۋىنسىز قالعان بالالاردىڭ ەسەبىن جۇرگىزەدى جانە ولاردى قايتارۋ بويىنشا شارالار قابىلدايدى.
قوسا كەتسەك، 2022 -جىلى شەت مەملەكەتتەردە اتا-اناسىنىڭ قامقورلىعىنسىز قالعان 43 بالا وزبەكستانعا قايتارىلدى.
اۆتور
ءاليحان اسقار
