رەسەي سالاتىن ءۇش ج ە و- نىڭ تاريفى قانداي بولادى
استانا. KAZINFORM - ەنەرگەتيكا مينيسترلىگى Kazinform ساۋالىنا جولداعان جاۋاپتا وسكەمەن، سەمەي، كوكشەتاۋ قالالارىندا رەسەي ينۆەستورلارى سالاتىن ءۇش جىلۋ-ەلەكتر ورتالىعىنىڭ قانداي تاريفپەن جۇمىس ىستەيتىنى تۋرالى تۇسىنىكتەمە بەردى.
- كوكشەتاۋ، سەمەي جانە وسكەمەن قالالارىندا ءۇش ج ە و سالۋ قازاقستان رەسپۋبليكاسى مەن رەسەي فەدەراتسياسىنىڭ ۇكىمەتتەرى اراسىنداعى 2024-جىلعى 17-ساۋىردەگى جوبالار بويىنشا ىنتىماقتاستىق تۋرالى كەلىسىم نەگىزىندە جۇزەگە اسىرىلاتىنىن اتاپ وتكەن ءجون. بۇل جوبالار ىسكە اسىرۋدىڭ باستاپقى ساتىسىندا ەكەنىن ەسكەرە وتىرىپ، ءبىرىڭعاي ساتىپ الۋشىنىڭ تاريفىنە اسەر ەتۋدى وبەكتيۆتى ەسەپتەۋ مۇمكىن ەمەس، - دەپ جازادى مينيسترلىك ماماندارى.
جاۋاپتا قاراپايىم تۇرعىنداردىڭ ەلەكتر قۋاتىن تۇتىنۋ تاريفى بىرنەشە تاريفتەردەن قۇرالاتىنى ايتىلعان.
- سوڭعى تۇتىنۋشى ءۇشىن ەلەكتر ەنەرگياسىن ساتۋ باعاسى ەلەكتر ەنەرگياسىن ءبىرىڭعاي ساتىپ الۋشىنىڭ باعاسى، ەلەكتر ەنەرگياسىن جەلى ارقىلى بەرۋ ءتاريفى، ەنەرگيامەن جابدىقتاۋ ۇستەمەسىنىڭ قۇنىنان تۇراتىنىن اتاپ وتكەن ءجون. ەلەكتر ەنەرگەتيكاسى سالاسىنداعى زاڭناماعا سايكەس ەنەرگيا ءوندىرۋشى ۇيىمدار وزدەرى وندىرگەن ەلەكتر ەنەرگياسىن تەك ءبىرىڭعاي ساتىپ الۋشىعا ساتۋعا قۇقىلى. بۇل رەتتە، ءبىرىڭعاي ساتىپ الۋشى تەتىگى جاڭادان ەنگىزىلەتىن گەنەراتسيالاۋ كوزدەرىنىڭ جوعارى تاريفتەرىن تەڭگەرىمدەۋدى جانە قولدانىستاعى اكتيۆتەردى جاڭارتۋدى قامتاماسىز ەتۋگە، سول ارقىلى تۇپكىلىكتى تۇتىنۋشىلار ءۇشىن تاريفتەردىڭ ءوسۋىن بارىنشا ازايتۋعا باعىتتالعان، - دەپ جازىلعان مينيسترلىك جاۋابىندا.
بۇعان دەيىن قىتاي ينۆەستيتسياسىنا سالىناتىن جەل مەن كۇن ەلەكتر ستانسالارىنىڭ تاريفى جاريالانعانىن جازعان ەدىك.
