رەسەي مۇنايىن قىتايعا تاسىمالداۋدان ەلىمىزگە 1,3 ميلليارد تابىس ءتۇستى

استانا. قازاقپارات - ەلىمىز سوڭعى 10 جىل ىشىندە رەسەيدىڭ 91 ميلليون تونناعا جۋىق مۇنايىن قىتايعا ترانزيت ارقىلى تاسىمالداپ، 1 ميلليارد 327 ميلليون دوللار پايدا تاپتى.

قوس مەملەكەت اراسىنداعى بۇل كەلىسىمنىڭ مەرزىمىن تاعى 10 جىلعا ۇزارتۋ كوزدەلىپ وتىر. ءبىراق وسى جولى تۇسەر تۇپكى تابىس كولەمى 2 ميلليارد دوللارعا جۋىقتاپ قالۋى مۇمكىن، دەيدى سەناتورلار. حاتتامانى بەكىتۋ تۋرالى زاڭ سەنات وتىرىسىندا ءبىراۋىزدان ماقۇلداندى.

سەرىك شايداروۆ، ق ر پارلامەنتى سەناتىنىڭ دەپۋتاتى:

- بۇل جۇمىس مەملەكەت باسشىسىنىڭ 2023 -جىلعى 17-مامىرداعى قىتايعا ساپارى جانە «ادىلەتتى قازاقستان» سايلاۋالدى باعدارلاماسىن ىسكە اسىرۋ جونىندەگى ءىس-شارالاردى ورىنداۋ اياسىندا جۇرگىزىلۋدە. 2024 -جىلدان 2034 -جىلعا دەيىنگى كەزەڭدە قازاقستان رەسپۋبليكاسى اۋماعى ارقىلى قىتايعا رەسەي مۇنايىنىڭ ترانزيتى ءۇشىن 2 ۋچاسكە بويىنشا كۇتىلەتىن ءتۇسىم 1 ميلليارد 710 ميلليون دوللار. سونىمەن قاتار كەلىسىمدى ۇزارتۋ ارقىلى ومبى-پاۆلودار مۇناي قۇبىرىمەن تۇسەتىن مۇنايمەن پاۆلودار مۇناي-حيميالىق زاۋىتىن جۇكتەۋدى قامتاماسىز ەتەدى.

24.kz