رەسەي مەن قازاقستان بىرلەسىپ تۇسىرگەن فيلم شاڭحاي كينوفەستيۆالىندە جۇلدە الدى

استانا. KAZINFORM - رەسەي مەن قازاقستان بىرلەسىپ تۇسىرگەن «ۇل» انيماتسياسى 27- شاڭحاي حالىقارالىق كينوفەستيۆالىندە «ۇزدىك انيماتسيالىق قىسقامەتراجدى فيلم» جۇلدەسىن جەڭىپ الدى، دەپ حابارلايدى قىتايلىق «حالىق گازەتى».

فيلمنىڭ سيۋجەتى - بالاسىن جالعىز ءوزى تاربيەلەپ وتىرعان مۇگەدەكتەر ارباسىنا تاڭىلعان اكەنىڭ حيكاياسى تۋرالى. فيلم رەسەي مەن قازاقستان ىنتىماقتاستىعى اياسىندا جاسالعان.

سونداي-اق، قىرعىزستاندىق «قارا. قىزىل. سارى» فيلمى بيىلعى «التىن كۋبوك» سىيلىعىنىڭ «ۇزدىك فيلم» جۇلدەسىن ەنشىلەسە، جاپوندىق «قۇمداعى جاز» بەن قىتايلىق «ۇزاق ءتۇن دە بىتەدى» فيلمدەرى «التىن كۋبوك» سىيلىعى اياسىندا قازىلار القاسىنىڭ باس جۇلدەسىن يەلەنگەن.

ەسكە سالا كەتەيىك، دۇنيەجۇزىلىك كينو ونەرىنىڭ 130 جىلدىعى مەن قىتاي كينوسىنىڭ 120 جىلدىعىمەن تۇسپا- تۇس كەلگەن قىتاي كينوسىنىڭ تۋعان جەرى شاڭحاي حاۋڭپۋ وزەنىنىڭ جاعاسىندا الەمنىڭ تۇكپىر-تۇكپىرىنەن كەلگەن 100 دەن استام رەجيسسەردى قارسى العان.

شاڭحاي مەن ونىڭ ماڭىنداعى ايماقتاعى 50-گە جۋىق كينوتەاتردا 71 ەلدەن 400 فيلم كورسەتىلدى. فيلمدەر «نەگىزگى بايقاۋ»، «ازيالىق جاڭادان كەلگەندەر»، «دەرەكتى فيلم»، «انيماتسيا» جانە «قىسقامەتراجدى فيلم» اتتى بەس نوميناتسيا بويىنشا «التىن كۋبوك» جۇلدەسىن ساراپقا سالدى.

ەسكە سالا كەتەيىك، بۇعان دەيىن ديماش قۇدايبەرگەن شاڭحاي حالىقارالىق كينوفەستيۆالىنىڭ جابىلۋ سالتاناتىندا ونەر كورسەتكەنىن جازعامىز.

اۆتور

باقىتجول كاكەش