رەسەي امۋر جولبارىستارىن قازاقستانعا بەرۋگە دايىن
استانا. KAZINFORM -امۋر جولبارىستارىن رەسەيدەن قازاقستانعا اكەلىپ رەينترودۋكسيالاۋ جوباسى بويىنشا كەلىسسوزدەر جۇرگىزىلىپ جاتىر. رەسەي ادىستەمە ازىرلەپ، جولبارىستاردى تاپسىرۋعا دايىن، دەپ حابارلايدى Gazeta.Ru.
بۇل تۋرالى «امۋر جولبارىسى» ورتالىعىنىڭ باس ديرەكتورى سەرگەي اراميليەۆ ريا نوۆوستي اگەنتتىگىنە بەرگەن سۇحباتىندا ايتتى.
2022 -جىلى شىعىس ەكونوميكالىق فورۋمىندا رەسەي مەن قازاقستان جولبارىستاردى قازاقستانعا قايتارۋ تۋرالى كەلىسىمگە قول قويدى جانە ولاردىڭ ءبىرازى پريمورەدەن جەتكىزىلۋى مۇمكىن.
رەسەي پرەزيدەنتى ۆلاديمير پۋتين قازاقستان رەسەي تاجىريبەسىنىڭ كومەگىمەن 2025 -جىلعا قاراي جولبارىستاردى ورتالىق ازياعا قايتارا الاتىنىنا سەنىم ءبىلدىردى.
اراميليەۆتىڭ ايتۋىنشا، ءبىرىنشى كەزەڭدە قازاقستاندا وڭالتۋ ورتالىعىندا وسكەن ءتورت جولبارىستى شىعارۋ جوسپارلانۋدا.
«جوبا قازىر توقتاپ تۇر. رەسەي ءوز مىندەتتەمەلەرىن ورىندادى، ادىستەمە ازىرلەدى جانە دالادا ەركىن جۇرگەن گەنى تازا جولبارىستار قورى بار. ءبىز جانۋارلاردى قازاقستانعا قىسقا مەرزىمدە تاپسىرۋ ءۇشىن دايىنداۋعا دايىنبىز.. . كەلىسسوزدەر شتاتتىق رەجيمدە جالعاسۋدا»، - دەدى اراميليەۆ.
سونداي- اق ول ب ا ق- تا گوللانديا حايۋاناتتار باعىنان الىنعان جولبارىستاردى پايدالانۋ مۇمكىندىگى تۋرالى اقپارات پايدا بولعانىن ايتتى. ونىڭ پىكىرىنشە، بۇل جوبانى جۇزەگە اسىرۋدى قيىنداتادى.
«بۇل باستاما جۇزەگە اسىرىلا قويماس دەگەن ۇمىتتەمىز. مۇندا ەكولوگيالىق ماسەلەلەرمەن قاتار ساياسي ماسەلەلەر دە بار، ءبىز بيلىكتىڭ شەشىمىن كۇتەمىز»، - دەپ قوستى ول.
اراميليەۆ جوبانىڭ باستى قيىندىعى قازاقستانداعى جولبارىستاردىڭ تابيعي مەكەندەۋ ورتاسىن، اسىرەسە كەڭ جايىلىمدار جاعدايىندا قايتا قۇرۋ ەكەنىن اتاپ ءوتتى. نەگىزگى مىندەت - جولبارىستىڭ مالعا شابۋىلىنىڭ الدىن الۋ جانە ادامدارمەن كەزدەسۋ مۇمكىندىگىن ازايتۋ.
