رۋسلان بەردەنوۆكە جاسالعان قاستاندىق: قىلمىستىق ءىس بويىنشا تەرگەۋ اياقتالدى
تۇركىستان. KAZINFORM - شىمكەنت قالاسى اكىمىنىڭ ورىنباسارى رۋسلان بەردەنوۆكە جاسالعان قاستاندىق ءىسى بويىنشا تەرگەۋ اياقتالدى. قازىر پروتسەسس قاتىسۋشىلارى قىلمىستىق ءىستىڭ ماتەريالدارىمەن تانىسىپ جاتىر.
كۇدىكتى ەرنار جيەنباي بۇعان دەيىن «تۇرعىن ءۇي شىمكەنت» ج ش س ديرەكتورىنىڭ مىندەتىن اتقارعان. ول 21-ءساۋىر كۇنى وقيعا ورنىندا، ياعني اكىمدىك عيماراتىنىڭ جانىندا ۇستالدى. سول كۇنى سوت ونى ەكى اي مەرزىمگە قاماۋعا الۋ تۇرىندەگى بۇلتارتپاۋ شاراسىن سانكسيالادى. باستاپقىدا قىلمىستىق ءىستى سوتقا 21-ماۋسىمدا تاپسىرۋ جوسپارلانعان بولاتىن.
- تەرگەۋ اياقتالدى، قازىرگى ۋاقىتتا تاراپتار ءىستىڭ ماتەريالدارىمەن تانىسىپ جاتىر. ودان كەيىن ءىس پروكۋراتۋراعا جولدانىپ، سوسىن سوتقا جىبەرىلەدى. سوت قاراۋى باستالعان جوق، - دەپ ءتۇسىندىردى سوتتان.
شىمكەنت قالاسى پوليتسيا دەپارتامەنتىنىڭ مالىمەتىنشە، تەرگەۋ قازاقستان رەسپۋبليكاسى قىلمىستىق كودەكسىنىڭ ەكى بابىنا سايكەس جۇرگىزىلىپ جاتىر.
- ق ر قىلمىستىق كودەكسىنىڭ 24-بابىنىڭ 3-بولىگى - قىلمىسقا وقتالۋ (قىلمىستى ورىنداۋعا باعىتتالعان، ءبىراق وزىنە بايلانىستى ەمەس جاعدايلاردان تولىق ورىندالماعان نيەتتى ارەكەتتەر)؛
- ق ر قىلمىستىق كودەكسىنىڭ 99-بابىنىڭ 2-بولىگىنىڭ 6-تارماعى - ومىرگە قاۋىپتى ادىسپەن ادام ولتىرۋگە وقتالۋ.
وسى باپتار بويىنشا سانكسيا سوت شەشىمىمەن 15 تەن 20 جىلعا دەيىن باس بوستاندىعىنان ايىرۋدى نەمەسە مۇلىكتى تاركىلەپ نەمەسە تاركىلەمەي ءومىر بويى باس بوستاندىعىنان ايىرۋدى كوزدەيدى.
ەسكە سالا كەتەيىك، 21-ءساۋىر كۇنى شىمكەنت قالاسى اكىمىنىڭ ورىنباسارى رۋسلان بەردەنوۆ اكىمدىك عيماراتىنىڭ ماڭىندا جارالانعان بولاتىن. ول اۋىر جاراقاتتارمەن اۋرۋحاناعا جەتكىزىلىپ، جەدەل تۇردە وتا جاسالدى.
سونداي-اق شىمكەنت قالاسىنىڭ اكىمدىگى كۇدىكتىنىڭ ۇستالۋىنا جانە تەرگەۋ بارىسىنا قاتىستى رەسمي مالىمەت بەردى. ەكى اپتا وتكەن سوڭ رۋسلان بەردەنوۆ اۋرۋحانادان شىعارىلىپ، وقيعادان كەيىن العاش رەت كوپشىلىككە مالىمدەمە جاسادى.
