رۋسلان بەردەنوۆكە جاسالعان قارۋلى شابۋىل: قىلمىستىق ءىس ەكى باپ بويىنشا قوزعالدى

شىمكەنت. KAZINFORM - كۇدىكتى 15 جىلدان باستاپ ءومىر بويىنا باس بوستاندىعىنان ايىرىلۋى مۇمكىن.

شىمكەنت قالالىق پوليتسيا دەپارتامەنتىنىڭ مالىمەتىنشە، تەرگەۋ قىلمىستىق كودەكسىنىڭ ەكى بابى بويىنشا جۇرگىزىلىپ جاتىر.

- ق ك 24-بابى 3-بولىگى - قىلمىس جاساۋعا تۋرا باعىتتالعان، تىكەلەي پيعىلمەن جاسالعان ارەكەتتەر (ارەكەتسىزدىك)، ەگەر بۇل رەتتە قىلمىس ادامعا بايلانىستى ەمەس ءمان-جايلار بويىنشا اقىرىنا دەيىن جەتكىزىلمەگەن بولسا، قىلمىسقا وقتالۋ دەپ تانىلادى.

- ق ك 99-بابى 2-بولىگى 6-تارماعى - باسقا ادامداردىڭ ومىرىنە قاۋىپتى تاسىلمەن جاسالعان كىسى ولتىرۋگە وقتالۋ.

اتالعان قىلمىستار ءۇشىن 15 جىلدان 20 جىلعا دەيىنگى مەرزىمگە نەمەسە ءومىر بويىنا باس بوستاندىعىنان ايىرۋ جازاسى كوزدەلگەن. جازا مۇلىكتى تاركىلەۋمەن نەمەسە ونسىز، سوتتىڭ شەشىمى بويىنشا تاعايىندالادى.

ايتا كەتەيىك، بۇدان بۇرىن شىمكەنتتە قالا اكىمىنىڭ ورىنباسارى رۋسلان بەردەنوۆكە قاستاندىق جاسالان بولاتىن. كۇدىكتى شەنەۋنىككە قاراي ءۇش رەت وق اتقان. وقيعا سالدارىنان اكىمدىك قىزمەتكەرى جاراقات الىپ، اۋرۋحاناعا جەتكىزىلدى.

ال، دارىگەرلەر رۋسلان بەردەنوۆتىڭ ومىرىنە قاۋىپ ءتونىپ تۇرماعانىن ايتتى. جاسالعان وتا دا ءساتتى ءوتتى.