رۋسلان بەردەنوۆ جاقىندا اۋرۋحانادان شىعاتىنىن ايتتى
شىمكەنت. KAZINFORM- شىمكەنت قالاسى اكىمىنىڭ ورىنباسارى رۋسلان بەردەنوۆ الەۋمەتتىك جەلىدە جازبا قالدىردى.
قاستاندىق جاسالىپ، وق تيگەن رۋسلان بەردەنوۆ قازىرگى جاعدايىن باياندادى. سونداي-اق، قيىن ساتتە قولداۋ بىلدىرگەن كوپشىلىككە العىس ايتتى.
- مەنىڭ باسىما تۇسكەن اۋىر جاعدايدان كوپشىلىگىڭىز حاباردارسىزدار دەپ بىلەمىن. بۇل وقىس وقيعا ماعان دا، مەنىڭ وتباسىم مەن جاقىندارىما دا اۋىر تيگەنى انىق. مۇنى سوزبەن ايتىپ جەتكىزۋ وتە قيىن. الايدا سىناققا تولى بولعان وسى ۋاقىت ارالىعىندا كوپتەگەن ادامداردىڭ، ارىپتەستەرىمنىڭ، تامىر-تانىستارىمنىڭ جاناشىرلىعىن، قولداۋىن، تىلەكتەستىگىن سەزىندىم. تەلەفونىما تۇسكەن قوڭىراۋلار، حابارلامالار، الەۋمەتتىك جەلىدەگى تىلەۋلەس جازبالار كوڭىلىمە دەمەۋ بولعانىن، كۇش-قۋات بەرگەنىن، سەرگىتكەنىن ايتقىم كەلەدى، - دەپ جازدى ول.
سونداي-اق، رۋسلان بەردەنوۆ 3 اپتاعا سوزىلعان اۋرۋحاناداعى كۇندەرى اياقتالىپ، كۇندەلىكتى تىرشىلىككە ورالاتىن ءسات تاياپ قالعانىن جەتكىزدى.
- البەتتە، ءبىرىنشى اللانىڭ، سودان سوڭ دارىگەرلەرىمىزدىڭ ءجىتى باقىلاۋىنىڭ، ەم-دومىنىڭ ارقاسىندا دەنساۋلىعىم وڭالدى، قالپىنا كەلدى. وسى ۋاقىت ىشىندە مەن ەلىمىزدىڭ مەديتسيناسى كوپ ىلگەرىلەگەنىنە، شەتەلدىك كلينيكالاردان ەش كەم ەمەستىگىنە كوز جەتكىزدىم. اق حالاتتى ابزال جاندارىمىزدىڭ مەيىرىمى مەن كاسىبيلىگى دە ريزاشىلىعىمىزعا ابدەن لايىق. بارشاڭىزدىڭ قولداۋىڭىز بەن جاناشىرلىقتارىڭىزعا شەكسىز العىسىمدى ايتامىن، - دەپ جازدى ول.
ايتا كەتەيىك، بۇدان بۇرىن شىمكەنتتە قالا اكىمىنىڭ ورىنباسارى رۋسلان بەردەنوۆكە قاستاندىق جاسالعان بولاتىن. كۇدىكتى شەنەۋنىككە قاراي ءۇش رەت وق اتقان. وقيعا سالدارىنان اكىمدىك قىزمەتكەرى جاراقات الىپ، اۋرۋحاناعا جەتكىزىلدى.
ال دارىگەرلەر رۋسلان بەردەنوۆتىڭ ومىرىنە قاۋىپ ءتونىپ تۇرماعانىن ايتتى. جاسالعان وتا دا ءساتتى ءوتتى.
اۆتور
قايرات زاينيشيەۆ
