رەسپۋبليكام - ماقتانىشىم: استانادا «اتامەكەن» ءانىن 400 وقۋشى قاتار تۇرىپ شىرقادى
استانا. KAZINFORM - رەسپۋبليكا كۇنىنە وراي ۇلتتىق پاتريوتتىق سەزىمدى وياتاتىن اندەر بويىنشا قالا مەكتەپتەرىندە «تۋعان ەلىم - قازاقستانىم» اتتى مەگاچەللەندج باستالدى. بارلىق ءبىلىم بەرۋ ۇيىمدارىنىڭ وقۋشىلارى رۋحتى كوتەرەتىن پاتريوتتىق اندەردى ورىندايدى، دەپ جازدى ەلوردا اكىمدىگىنىڭ رەسمي سايتى.
بۇل رەتتە استاناداعى №50- «قازعارىش» مەكتەپ-ليتسەيىندە ءتورت ءجۇز وقۋشى ەسكەندىر حاسانعالييەۆتىڭ «اتامەكەن» ءانىن ورىندادى. مۇنداعى ماقسات - جاس ۇرپاقتىڭ وتانسۇيگىشتىك، ۇلتجاندىلىق، ەل مەن جەرگە دەگەن قۇرمەتىن ارتتىرۋ. سونداي-اق مەرەكە اياسىندا بۇگىن ءبىلىم بەرۋ ۇيىمدارىندا بارلىق سىنىپتار اراسىندا «رەسپۋبليكام - ماقتانىشىم» اتتى سىنىپ ساعاتتارى وتەدى. وندا وقۋشىلار تانىمال ادامدارمەن كەزدەسەدى.
«رەسپۋبليكا كۇنى - ءبىزدىڭ باستى ۇلتتىق مەرەكەمىزدىڭ ءبىرى. بۇل ءبىز ءۇشىن ايرىقشا ماعىناعا يە. استانا قالاسى ءبىلىم باسقارماسى مەرەكە اياسىندا ءبىلىم بەرۋ ۇيىمدارىندا اۋقىمدى ءىس-شارالار ۇيىمداستىرۋدى جوسپارلاپ وتىر. باستى ماقسات - وقۋشىلاردىڭ بويىنداعى وتانسۇيگىشتىك، ۇلتجاندىلىق سەزىمدەرىن وياتۋ»، - دەدى استانا قالاسى ءبىلىم باسقارماسىنىڭ باسپا ءسوز حاتشىسى اياجان امانتاي قىزى.
باسپا ءسوز حاتشىسىنىڭ ايتۋىنشا، اتالعان چەللەندج 24-قازانعا دەيىن جالعاسادى جانە بارلىق مەكتەپتەردى قامتيدى.
ايتا كەتەيىك، 25-قازان كۇنى ەلىمىزدە ۇلتتىق مەرەكە - رەسپۋبليكا كۇنى اتاپ وتىلەدى. وسى ايتۋلى كۇننىڭ قۇرمەتىنە استانادا 100-دەن استام مادەني-بۇقارالىق، ءبىلىم بەرۋ، سپورتتىق جانە الەۋمەتتىك ءىس-شارا وتكىزىلەدى. ولاردىڭ اراسىندا مەرەكەلىك كونسەرتتەر، كورمەلەر، بالالارعا ارنالعان كورنەكتى نىساندار بويىنشا ەكسكۋرسيالار، دوڭگەلەك ۇستەلدەر، ۇلتتىق سپورت تۇرلەرى بويىنشا تۋرنيرلەر جانە باسقا دا كوپتەگەن ءىس- شارالار بار.
استانادا رەسپۋبليكا كۇنىنە وراي قانداي ءىس-شارالار وتەتىنىن جازعان بولاتىنبىز.
