گرەنلانديا مۇزدىعى بىلتىر مامىردا 17 ەسە جىلدام ەرىپ كەتكەن
استانا. KAZINFORM - الەمدەگى ەڭ ۇلكەن ارال - گرەنلاندياداعى مۇزدىقتار 2024 -جىلدىڭ مامىر ايىنداعى اپتاپ ىستىق كەزىندە ورتاشا ەسەپپەن 17 ەسە تەزىرەك ەرىپ كەتتى، دەپ جازدى انادولى.
يسلادنياداعى مەتەوستانتسيالاردىڭ %84 ى «رەكوردتىق تەمپەراتۋرالاردى» تىركەدى.
مەتەورولوگيالىق قۇبىلىستاردى زەرتتەيتىن عىلىمي ۇيىم World Weather Attribution (WWA) گرەنلانديا مۇزدىعىنىڭ جاي- كۇيى تۋرالى زەرتتەۋ جاريالادى.
زەرتتەۋگە سايكەس، يسلاندياداعى مەتەوستانتسيالاردىڭ %84 ى مامىر ايىندا «رەكوردتىق تەمپەراتۋرالاردى» تىركەگەن. بۇل 1991-2020 -جىلدارداعى مامىر ايىنىڭ ەڭ جوعارى ورتاشا تەمپەراتۋراسىنان 13 گرادۋستان استام جوعارى كورسەتكىش.
عالىمدار مامىر ايىنداعى اپتاپ ىستىق كەزىندە گرەنلانديا مۇزدىعىنىڭ ورتاشا كورسەتكىشپەن سالىستىرعاندا 17 ەسە جىلدام ەرىپ كەتكەنىن اتاپ ءوتتى. مۇنداي تەمپەراتۋرالار يسلانديا مەن گرەنلانديادا «100 جىلدا ءبىر رەت» بايقالۋى مۇمكىن.
عالىمداردىڭ پىكىرىنشە، بۇل جىلۋ تولقىنى «سۋىققا بەيىمدەلگەن» ايماقتاردا، سونىڭ ىشىندە يسلانديا مەن گرەنلانديادا «ەرەكشە سالدارلارعا» اكەپ سوعۋى مۇمكىن.
- گرەنلانديا مەن يسلانديادا ينفراقۇرىلىم سۋىق اۋا-رايىنا بەيىمدەلگەن، سوندىقتان مۇز ەرىگەندە جولدار مەن باسقا دا ينفراقۇرىلىمنىڭ زاقىمدانۋى، سۋ تاسقىنى بولۋى مۇمكىن، - دەيدى زەرتتەۋشىلەر.
بيىل 15-مامىردا يسلانديادا تەمپەراتۋرا 26 گرادۋستان اسىپ، بۇل سولتۇستىك اتلانتيكاداعى ەل ءۇشىن «وتە ەرەكشە» جاعداي بولدى.
گرەنلانديا - شالعاي، سۋىق ءارى سيرەك قونىستانعان ارال
گرەنلانديا - الەمدەگى ەڭ ۇلكەن ارال، ونىڭ اۋماعى 2,16 ميلليون شارشى كيلومەتردى قۇرايدى جانە ول اركتيكا ايماعىندا ورنالاسقان. جازدا ارالداعى ورتاشا تەمپەراتۋرا +10°C، ال قىستا - 10°C شاماسىندا.
بۇل ارال الەمدەگى ەڭ سيرەك قونىستانعان ايماقتاردىڭ ءبىرى بولىپ تابىلادى، مۇندا شامامەن 57 مىڭ ادام تۇرادى، ولاردىڭ باسىم بولىگى - ءتۇپ ناسىل ينۋيتتەر. ارالدىڭ %80 ىن مۇزدىقتار جابادى، سوندىقتان حالىق نەگىزىنەن ارالدىڭ وڭتۇستىك- باتىس جاعالاۋىنداعى نۋۋك قالاسىنىڭ ماڭىندا شوعىرلانعان.
