پرەمەر-مينيستر تۇتقىنعا تۇسپەۋ ءۇشىن بالاما باعىتتارمەن ۇشىپ ا ق ش- قا باردى
استانا. KAZINFORM - يزرايل پرەمەر-ءمينيسترى بينيامين نەتانياحۋ ا ق ش پرەزيدەنتى دونالد ترامپپەن كەزدەسۋىندە باج سالىعىن جەڭىلدەتۋگە كۇش سالماق.
پرەمەر-مينيستر تۇتقىنعا الىنۋ قاۋپىن بولدىرماۋ ءۇشىن بالاما باعىتتارمەن ۇشىپ ا ق ش- قا باردى
سونىمەن قاتار كۇن تارتىبىندە يزرايلدىك تۇتقىندار، تاريفتەر مەن گازا سەكتورىنداعى سوعىس بار، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
جەكسەنبى كۇنى يزرايل پرەمەر-ءمينيسترى بينيامين نەتانياحۋ ا ق ش پرەزيدەنتى دونالد ترامپ ۆاشينگتونداعى كەزدەسۋ قورىتىندىسىنان كەيىن يزرايلگە قارسى سالىناتىن باج سالىعىن جەڭىلدەتەدى دەپ ۇمىتتەنەتىنىن ايتتى.
ترامپ جاريا ەتكەن كەڭ اۋقىمدى جاڭا تاريف ساياساتى اياسىندا يزرايلدىك تاۋارلارعا ا ق ش 17 پايىز باج سالىعىن سالماق.
قۇراما شتاتتار يزرايلدىڭ سەنىمدى وداقتاسى ءارى ءىرى ساۋدا سەرىكتەسى سانالادى.
جەكسەنبى كۇنى سوڭعى بىرنەشە كۇن ماجارستاندا ساپاردا بولعان نەتانياحۋ ۆاشينگتونعا ۇشىپ كەلدى جانە بۇگىن ترامپپەن كەزدەسۋ وتكىزەدى.
يزرايل پرەمەر-ءمينيسترى كەلىسسوزدەر سوعىستىڭ 18ايىنان كەيىن دە گازا سەكتورىندا ءالى تۇتقىندا وتىرعان يزرايلدىكتەرگە، پالەستينا انكلاۆىندا جەڭىسكە جەتۋگە جانە يزرايلگە قاتىستى تاريف رەجيمى تالقىلاۋعا قاتىستى بولاتىنىن ايتتى.
نەتانياحۋ كەڭسەسى «يزرايل-تۇركيا قارىم-قاتىناسى، يران قاۋپى جانە حالىقارالىق قىلمىستىق سوتپەن تەكەتىرەس» تە كۇن تارتىبىندە بولاتىنىن حابارلادى.
- مەن بۇل ماسەلەدە كومەك بەرە الامىن دەپ ۇمىتتەنەمىن. وسىنداي نيەت بار. مەن يزرايل ەكونوميكاسى ءۇشىن دە وتە ماڭىزدى وسىناۋ ماسەلە بويىنشا پرەزيدەنت ترامپپەن كەزدەسەتىن العاشقى حالىقارالىق كوشباسشىمىن، ءبىرىنشى شەتەلدىك كوشباسشىمىن. مۇنى ءوز ەكونوميكالارىنا قاتىستى جاساعىسى كەلەتىن ءبىرقاتار كوشباسشى بار. مەنىڭشە، بۇل ەرەكشە جەكە بايلانىستى، سونىمەن قاتار قازىرگى ۋاقىتتا اسا ماڭىزدى ا ق ش پەن يزرايل اراسىنداعى ەرەكشە بايلانىستى كورسەتەدى، - دەدى نەتانياحۋ.
يزرايل پرەمەر-ءمينيسترى ۆاشينگتونعا كەلگەن بەتتە بلەر ۇيىندە ا ق ش-تىڭ ساۋدا ءمينيسترى گوۆارد ليۋتنيكپەن جانە ساۋدا وكىلى دجەيميسون گريرمەن كەزدەسىپ ۇلگەردى. نەتانياحۋ كەڭسەسىنىڭ مالىمەتىنشە، كەزدەسۋ «جىلى ءارى ناتيجەلى» بولدى.
Reuters انونيمدى دەرەككوزدەرگە سىلتەمە جاساپ حابارلاۋىنشا، ترامپ كۇتپەگەن شاقىرۋدى 4- ساۋىردە نەتانياحۋمەن تەلەفون ارقىلى سويلەسكەندە، يزرايل باسشىسى تاريفتەر ماسەلەسىن كوتەرگەن كەزدە جاساعان.
يزرايل ترامپ اكىمشىلىگىنىڭ جاڭا تاريفتەرىن كۇتە وتىرىپ، 1- ساۋىردە ا ق ش يمپورتىنا قاتىستى قالعان باج سالىعىن الىپ تاستاعان ەدى. ەكى ەل 40 جىل بۇرىن ەركىن ساۋدا تۋرالى كەلىسىمگە قول قويعان جانە ەندى ا ق ش تاۋارلارىنىڭ شامامەن 98 پايىزىنا سالىق سالىنبايدى.
يزرايلدىك بۇقارالىق اقپارات قۇرالدارىنىڭ حابارلاۋىنشا، يزرايلدىڭ مەملەكەتتىك «سيون قاناتى» ۇشاعى بۋداپەشتتەن ۆاشينگتونعا دەيىنگى ارالىقتى شامامەن 400 شاقىرىمعا ۇزارتاتىن باعىتپەن ۇشىپ كەلگەن. بۇل ۇشاق شۇعىل قونۋعا ءماجبۇر بولعان جاعدايدا حالىقارالىق قىلمىستىق سوتتىڭ قاماۋعا الۋ وردەرىن ورىنداۋى مۇمكىن دەپ ەسەپتەلەتىن ەلدەردىڭ ۇستىنەن ۇشۋدان اۋلاق بولۋ ءۇشىن جاسالعان.
يزرايل گازاداعى بولجامدى اسكەري قىلمىستار ءۇشىن حالىقارالىق قىلمىستىق سوت بەرگەن وردەردى يرلانديا، يسلانديا جانە نيدەرلاندى ورىنداۋى مۇمكىن دەپ قاۋىپتەنەدى. سوندىقتان نەتانياحۋ ۇشاعى حورۆاتيا، يتاليا جانە فرانسيا اۋەسىمەن ۇشىپ ءوتتى. پرەمەر-مينيستر مىنگەن يزرايل ۇشاعى تۇتقىنعا الىنۋ قاۋپىن بولدىرماۋ ءۇشىن بالاما باعىتتاردى ۇستانعانى ءبىرىنشى رەت ەمەس ەكەنى دە ايتىلادى.
اۆتور
مارلان جيەمباي
