پرەمەر-مينيستر نەگە BI Group كە شۇيلىكتى - سەرىك جۇمانعاريننىڭ جاۋابى
استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ۇكىمەت باسشىسى ولجاس بەكتەنوۆتىڭ سالىق ماسەلەسىنە ارنالعان جيىندا نەگە BI Group پەن BAZIS-А كومپانيالارىنا شۇيلىككەنىن ءتۇسىندىردى.
- سىزدەر كامەرالدىق باقىلاۋدىڭ قورىتىندىسى بويىنشا حابارلاما جىبەرىلىپ جاتقان كومپانيالاردىڭ دەڭگەيىن ءتۇسىنسىن دەگەن ويمەن ءسىز ايتىپ تۇرعان كومپانيالاردى اتاۋ تۋرالى شەشىم قابىلدانعان بولاتىن. ويتكەنى ەل ىشىندە ەشكىم قول تيگىزە المايتىن كومپانيالار بار، ال بەيشارا ورتا جانە شاعىن بيزنەس بۇكىل اۋىرتپالىقتى ارقالاپ جاتىر دەگەن تۇسىنىك قالىپتاسقان. سوندىقتان پرەمەر-مينيستر ولجاس اباي ۇلى قانداي كومپانيالارمەن جۇمىس ىستەپ جاتقانىمىزدى كورسەتۋ ءۇشىن وسىلاردى اتادى. بىردەن ايتايىن، قول تيگىزۋگە بولمايتىن كومپانيا جوق. ءبارى سالىق تولەيدى، - دەدى ءول ماجىلىس وتىرىسىنان كەيىن ب ا ق وكىلدەرىنىڭ سۇراعىنا بەرگەن جاۋابىندا.
ۆيتسە-پرەمەر مۇنداي ءتاسىل سالىق ورگاندارىنىڭ قالىپتى جۇمىسى ەكەنىن اتاپ ءوتتى.
- بۇل جەردە اكەتىپ بارا جاتقان ەشتەڭە جوق. بىلتىر سالىق كوميتەتى ءسىز ايتىپ تۇرعان سياقتى 400 مىڭنان استام حابارلاما جولداعان بولاتىن. بۇل ولاردىڭ تۇراقتى جۇمىسى. تەك بۇل جولى سىزدەرگە سونىڭ كەيبىر تۇسىن اقتارىپ كورسەتتىك. ويتكەنى شىعىنداردى ۇنەمدەۋ، قوسىمشا كىرىس كوزدەرىن ىزدەۋ جۇمىستارىمەن ەشكىم اينالىسىپ جاتقان جوق دەگەنگە ساياتىن سىن وتە كوپ ايتىلىپ كەتتى. بۇل جولى سالىق كوميتەتىنىڭ كەيبىر اسپەكتىلەرى عانا سىزدەرگە اشىپ كورسەتىلدى. ونىڭ ىشىندە بلوگەرلەرگە جىبەرىلگەن حابارلامالار دا بار. 15 بلوگەر قازىردىڭ وزىندە 1,5 ميلليارد تەڭگە تابىسىن قايتا كورسەتىپ، 75 ميلليون تەڭگە سالىق تولەگەنىن بىلەسىزدەر. ال قازىرگى ءىرى كومپانيالارعا، قۇرىلىس كومپانيالارىنا قاتىستى ماسەلە سالىق كوميتەتىنىڭ قالاي جۇمىس ىستەپ جاتقانىنا مىسال بولا الادى. شىن مانىندە ونداي حابارلامالار وتە كوپ جىبەرىلىپ جاتىر، - دەدى سەرىك جۇمانعارين.
ەسكە سالساق، وتكەن اپتادا پرەمەر-مينيستر كاسىپكەرلەردى ەكى اپتادا سالىق سوماسىن ادىلەتتى تۇردە تولەۋگە شاقىرعان بولاتىن.
اۆتور
ەسىمجان ناقتىباي
