پرەمەر-مينيستر: مۇناي ءوندىرىسىن جىلىنا ەڭ كەمى 11 ميلليون توننا دەڭگەيدە ۇستاپ تۇرۋ - نەگىزگى باسىمدىق
استانا. KAZINFORM - قازاقستان پرەمەر-ءمينيسترى ولجاس بەكتەنوۆ «شيەۆرون» كومپانياسىنىڭ ەۋرازيالىق بولىمشەسىنىڭ باسقارۋشى ديرەكتورى دەرەك ماگنەسسپەن كەزدەستى. بۇل تۋرالى ۇكىمەتتىڭ باسپا ءسوز قىزمەتى حابارلادى.
پرەمەر-مينيستر مەملەكەت باسشىسى قاسىم-جومارت توقايەۆتىڭ تاپسىرماسى بويىنشا رەسپۋبليكادا اۋقىمدى ەكونوميكالىق رەفورمالار جۇرگىزىلىپ جاتقانىن ايتتى. ولار جالپى ىشكى ءونىمنىڭ جىل سايىن %6- عا جانە ودان دا جوعارى ءوسىمىن قامتاماسىز ەتۋى ءتيىس.
«ۇكىمەت ينۆەستورلارعا ينۆەستيتسيالىق جوبالاردى دامىتۋ ءۇشىن بارىنشا قولايلى جاعدايلار جاسايدى جانە قاجەتتى قولداۋ كورسەتەدى. ءوز كەزەگىندە ءبىز سەرىكتەستەرىمىزدەن جەرگىلىكتى الەۋەتتى بارىنشا پايدالانۋدى، تەحنولوگيالار ترانسفەرتىن، شيكىزاتتى تەرەڭ وڭدەۋدى كوزدەيتىن بىرلەسكەن جوسپارلاردى ۋاقىتىلى ىسكە اسىرۋ بويىنشا بەلسەندى ءىس-قيمىلداردى كۇتەمىز»، - دەدى ولجاس بەكتەنوۆ.
پرەمەر- مينيستر تەڭىز كەن ورنىندا ساعالىق قىسىمدى باسقارۋ جانە بولاشاق كەڭەيتۋ جوبالارىنىڭ سايكەسىنشە 2025-جىلدىڭ ءبىرىنشى جارتىجىلدىعىندا جانە 2024-جىلدىڭ ءبىرىنشى جارتىجىلدىعىندا اياقتالۋىن قامتاماسىز ەتۋ كەرەكتىگىن ايتتى.
سونىمەن قاتار پرەمەر-مينيستر ۇكىمەت قاراشىعاناق كەن ورنىن يگەرۋگە ۇلكەن ءمان بەرىپ وتىرعانىن اتاپ ءوتتى. بۇل رەتتە مۇناي مەن كوندەنسات ءوندىرۋدى جىلىنا ەڭ كەمى 11 ميلليون توننا دەڭگەيىندە ۇستاپ تۇرۋ نەگىزگى باسىمدىق بولىپ تابىلادى.
«قاراشىعاناقتا قۋاتى جىلىنا 4 ميلليارد تەكشە مەتردى قۇرايتىن گاز وڭدەۋ زاۋىتىن سالۋ جوباسىن ىسكە اسىرۋ تۋرالى تۇجىرىمدامالىق شەشىم كەن ورنىنىڭ بولاشاق دامۋى ءۇشىن ماڭىزدى ەكەنىن اتاپ وتكىم كەلەدى»، - دەدى ولجاس بەكتەنوۆ.
سونىمەن قاتار پرەمەر-مينيستر ەكونوميكالىق ساياساتتىڭ باسىمدىقتارىنىڭ ءبىرى جەرگىلىكتى قامتۋدى دامىتۋ ەكەنىنە نازار اۋداردى.
«وپەراتورلاردىڭ قاجەتتىلىكتەرى ءۇشىن ءونىم شىعارۋعا مۇددەلى جەرگىلىكتى وندىرۋشىلەرمەن تىعىز قارىم-قاتىناس قاجەت. بۇل رەتتە ەگەر ەلدە قاجەتتى تاۋارلار نەمەسە جابدىقتار وندىرىلمەسە، وندا ءبىز وسى وندىرىستەردى الداعى 2-3 جىلدا قازاقستان اۋماعىندا لوكاليزاتسيالاۋ جونىندەگى ناقتى جوسپارلاردى كورگىمىز كەلەدى. سوندىقتان وسى باعىتتاعى جۇمىستى قايتا قاراۋدى وتىنەمىن»، - دەدى ۇكىمەت باسشىسى.
ءوز كەزەگىندە دەرەك ماگنەسس «شيەۆرون» كومپانياسىنىڭ قازاقستانمەن بارلىق مۇددەلى باعىتتار بويىنشا ىنتىماقتاستىقتى نىعايتۋعا ءازىر ەكەنىن راستادى.
«ءبىز بىرگە جۇمىس ىستەپ، اراداعى سەرىكتەستىكتى دامىتۋعا مۇددەلىمىز. «شيەۆرون» قازاقستاننىڭ ەكونوميكاسىن دامىتۋ ءۇشىن جۇمسالىپ جاتقان كۇش-جىگەردى قولدايدى. بۇگىندە ينۆەستيتسيالار مەن جاڭا جوبالار ءۇشىن جاقسى جاعدايلار جاسالىپ جاتىر. ءوزارا سەرىكتەستىككە نەگىزدەلگەن بولاشاقتاعى دامۋ مۇمكىندىكتەرىن كورىپ وتىرمىز»، - دەدى ول.
اۆتور
باقىتگۇل اباي قىزى
