پرەمەر-مينيستر ەلگە جاناشىرلىق تانىتقان كاسىپكەرلەرگە العىس ايتتى
استانا. KAZINFORM - ۇيىمشىلدىق پەن اۋىزبىرشىلىكتىڭ ارقاسىندا سۋ تاسقىنى تابيعي اپاتىن امان-ەسەن ەڭسەرە الدىق. بۇل تۋرالى ەلورداداعى «ادال ازامات. ادال ەڭبەك. ادال بيزنەس» فورۋمىندا پرەمەر- مينيستر ولجاس بەكتەنوۆ ءمالىم ەتتى.
«مەملەكەت باسشىسى بيىلعى جولداۋىندا بيزنەس جۇرگىزۋگە قاجەت جاعدايدى جاقسارتۋ بويىنشا ءبىزدىڭ الدىمىزعا بىرنەشە ناقتى مىندەت قويدى. وسى ورايدا ۇكىمەت كاسىپكەرلەرمەن بىرگە ەلدەگى ىسكەرلىك بەلسەندىلىكتى ارتتىرۋ، بيزنەس باستامالارعا قولايلى جاعداي جاساۋ باعىتىندا جۇمىستاردى تۇراقتى جۇرگىزىپ كەلەدى. كەز كەلگەن ەكونوميكانىڭ نەگىزگى تىرەگى كاسىپكەرلىك ەكەنى بارشامىزعا ءمالىم. سوندىقتان وتاندىق كاسىپكەرلەرمەن سەنىمدى جانە ءوزارا ءتيىمدى سەرىكتەستىك ورناتۋ - ۇكىمەت ءۇشىن ءسوزسىز باسىمدىق»، - دەدى و. بەكتەنوۆ.
پرەمەر- مينيستر بيىلعى اۋقىمدى سۋ تاسقىنى كەزىندە بيزنەس وكىلدەرى دە جۇمىلىپ، جەرگىلىكتى حالىققا كومەك قولىن سوزعانىن ەسكە سالدى.
«ۇيىمشىلدىق پەن اۋىزبىرشىلىكتىڭ ارقاسىندا تابيعي اپاتتى امان- ەسەن ەڭسەرە الدىق. شاعىن جانە ورتا بيزنەس سۋبەكتىلەرى دە بۇل اپاتتان قاتتى زارداپ شەكتى. ولارعا كەلتىرىلگەن شىعىنداردى وتەۋ جۇمىستارى وسى جىلدىڭ ءساۋىر ايىنان باستاپ ءجۇرىپ جاتىر. بۇگىنگى كۇنگە دەيىن 10 ميلليارد تەڭگەدەن استام شىعىن وتەلدى»، - دەدى ول.
سونىمەن قاتار ۇكىمەت باسشىسى بيزنەس پرەزيدەنتتىڭ جالپى ۇلتتىق «تازا قازاقستان» باستاماسىن ىسكە اسىرۋعا دا بەلسەندى اتسالىسىپ جاتقانىن اتاپ ءوتتى.
«بۇل اكسيا اۋىلدىڭ نەمەسە قالانىڭ تازالىعى عانا ەمەس، ورتاق ماقساتقا جۇمىلعان قوعامنىڭ بىرلىگىنىڭ ايقىن كورىنىسى. سوندىقتان ەلگە جاناشىرلىق تانىتقان ازاماتتار مەن كاسىپكەرلەردىڭ بارلىعىنا ۇكىمەتتىڭ اتىنان شىنايى ريزاشىلىعىمدى بىلدىرگىم كەلەدى»، - دەدى ولجاس بەكتەنوۆ.
ايتا كەتەيىك، وسىعان دەيىن پرەمەر- مينيستر ولجاس بەكتەنوۆ ءتيىستى مينيسترلەر مەن ءوڭىر اكىمدەرىنىڭ قاتىسۋىمەن 2025 -جىلعى سۋ تاسقىنى كەزەڭىنە دايىندىق ماسەلەسى بويىنشا كەڭەس وتكىزدى.
