پرەمەر-مينيستر جەر ۇيلەردىڭ قاۋىپسىزدىگى تۋرالى: ەكى كۇننىڭ بىرىندە ءورت
استانا. KAZINFORM - پرەمەر-مينيستر ولجاس بەكتەنوۆ ۇكىمەت وتىرىسىندا جەر ۇيلەردەگى ءورتتىڭ ازايماي تۇرعانىنا الاڭداۋشىلىق ءبىلدىردى.
«جىلۋ بەرۋ كەزەڭى ەندى عانا باستالدى. ال، ەلىمىزدىڭ تۇرعىن ءۇي سەكتورىندا ەكى كۇننىڭ بىرىندە ءورت شىعادى. پەش جاعۋ كەزىندە قاراپايىم قاۋىپسىزدىك تالاپتارىنىڭ ساقتالماۋىنان ءبىر ايدا 130-دان استام ءورت تىركەلگەن.
سونداي-اق ىىس ءتيىپ ۋلانعان جاعدايلار جيىلەپ كەتتى. قازا تاپقاندار دا بار. وقىس جاعدايلاردى بارىنشا ازايتپاساق بولمايدى»، - دەدى ۇكىمەت باسشىسى.
ونىڭ سوزىنشە، قىس پەن كۇزدە ءورتتىڭ %50 عا جۋىعى پەش پەن مۇرجالارداعى اقاۋلاردان كەلەدى.
«توتەنشە جاعدايلار مينيسترلىگى وسىعان باسا نازار اۋدارىپ، مۇنداي بۇزۋشىلىقتارعا بەي-جاي قاراماۋعا ءتيىس. تەك ۇسىنىم بەرۋمەن عانا شەكتەلۋگە بولمايدى.
ول ءۇشىن گاز-تەحنيكالىق ينسپەكسيانىڭ وكىلەتتىگىن كۇشەيتۋ كەرەك. توتەنشە جاعدايلار، ىشكى ىستەر مينيسترلىكتەرى مەن اكىمدىكتەر بۇل باعىتتاعى پروفيلاكتيكالىق جۇمىستى كۇشەيتۋى قاجەت»، - دەدى ولجاس بەكتەنوۆ.
