پرەمەر-مينيستر بالالاردىڭ جازعى دەمالىسىن ۇيىمداستىرۋ جۇمىستارىن سىنعا الدى

استانا. KAZINFORM - بالالاردىڭ جازعى دەمالىسى ءتيىستى دەڭگەيدە ۇيىمداستىرىلمايدى، كوبىنەسە ەسەپ بەرۋ ءۇشىن اتۇستى جۇرگىزىلەدى. مۇنداي سىندى پرەمەر-مينيستر ولجاس بەكتەنوۆ ۇكىمەت وتىرىسىندا ايتتى.

«وتكەن جىلدارداعى تاجىريبە كورسەتكەندەي، بالالاردىڭ جازعى دەمالىسى مەن ولاردى ەڭبەككە باۋلۋ بارلىق جەردە بىردەي ءتيىستى دەڭگەيدە ۇيىمداستىرىلمايدى، جۇمىس كوبىنەسە ەسەپ بەرۋ ءۇشىن اتۇستى جۇرگىزىلەدى. تانىمدىق جانە مازمۇندى ءىس- شارالار از. ولاردىڭ ساپاسى ناشار، بالالاردىڭ قىزىعۋشىلىعى مەن بەيىمىن ەسكەرمەيدى. قاۋىپسىزدىك جانە سانيتاريالىق تالاپتار بويىنشا شەشىلمەگەن ماسەلەلەر بار. بۇل پروبلەمالاردى 1-ماۋسىمعا قاراي شەشۋ كەرەك»، - دەدى و. بەكتەنوۆ ۇكىمەت وتىرىسىندا.

سونىمەن بىرگە، پرەمەر وڭىرلىك شتابتارعا جەرگىلىكتى لاگەرلەردىڭ سانيتاريالىق- ەپيدەميولوگيالىق، ورتكە، تەرروريزمگە قارسى قاۋىپسىزدىك تالاپتارىنا ساي كەلۋىن باقىلاۋدى تاپسىردى.

«بالالار لاگەرلەرىندە، بۇقارالىق ورىنداردا باقىلاۋ كامەرالارى جۇمىس ىستەپ تۇرۋعا ءتيىس. جازعى دەمالىس كەزىندە بالالاردىڭ قاۋىپسىزدىگىنە تولىق كەپىلدىك بەرىلۋگە ءتيىس ەكەنىن ەرەكشە اتاپ وتەمىن. ىشكى ىستەر، توتەنشە جاعدايلار، وقۋ-اعارتۋ، دەنساۋلىق ساقتاۋ مينيسترلىكتەرى، ءوڭىر اكىمدىكتەرى ءتيىستى قىزمەتتەردىڭ ۇزدىكسىز جۇمىس ىستەۋىن قامتاماسىز ەتۋى قاجەت. لاگەرلەردە بالالارمەن جۇمىس ىستەيتىن پەرسونالدى مۇقيات ىرىكتەۋ قاجەت»، - دەدى ۇكىمەت باسشىسى.

ايتا كەتەيىك، پرەزيدەنت تاپسىرماسىمەن 2026 -جىلدىڭ سوڭىنا دەيىن بالالاردى ساۋىقتىراتىن 50 لاگەر قۇرىلىپ، بالالاردىڭ يننوۆاتسيالىق شىعارماشىلىعىنىڭ 100 ورتالىعى سالىنادى. قازىردىڭ وزىندە جىل بويى جۇمىس ىستەيتىن 2 لاگەر جانە 9 شىعارماشىلىق ورتالىعى اشىلدى.

ايتا كەتەيىك، بيىل ەلىمىزدە 10 مىڭنان استام دەمالىس ورنىندا 3 ميلليونعا جۋىق بالا جازعى دەمالىسىن وتكىزەدى.

اسىرەسە، تاسقىن سۋ بولعان وڭىرلەردىڭ بالالارى ساۋىقتىرۋ ورتالىقتارىنا جىبەرىلەدى.

اۆتور

ايجان سەرىكجان قىزى