پرەمەر-مينيستر: 2023 -جىلدى جاقسى ناتيجەلەرمەن شىعارىپ سالامىز
ق ر پرەمەر-ءمينيسترى ءاليحان سمايىلوۆ 2023 -جىلدى قورىتىندىلاپ، جاقسى ناتيجەلەر بولعانىن اتاپ ءوتتى، دەپ حابارلايدى Kazinform.
«ۇكىمەتتەگى وسى جىلعا ارنالعان جوسپارلى زاڭ جوبالارىن قاراپ بولدىق. ەندى ولاردى پارلامەنتكە ەنگىزۋ قاجەت. جالپى، 2023 -جىلعا ارنالعان زاڭ جوبالاۋ جۇمىستارى جوسپارىن ورىندالدى دەپ ماقۇلداۋدى ۇسىنامىن. بيىل قوعامدىق ءتارتىپتى قامتاماسىز ەتۋ، ەكونوميكا جانە بيۋدجەت، مەديا، سونداي-اق الەۋمەتتىك سالاداعى زاڭنامالىق باستامالاردى ىسكە اسىرۋ بويىنشا اۋقىمدى جۇمىستار اتقارىلدى»، - دەدى ءاليحان سمايىلوۆ ۇكىمەتتىڭ قورىتىندى وتىرىسىندا.
پرەمەر-مينيستر ۇكىمەتتىڭ زاڭ جوبالارىن ادىلەت مينيسترلىگىنە، ۇكىمەتكە جانە ماجىلىسكە ەنگىزۋ مەرزىمدەرى دە بىرنەشە رەت بۇزىلعانىن، جاڭا جوسپاردى ىسكە اسىرۋدا زاڭ جوبالارىن ۋاقىتىلى ەنگىزۋگە ەرەكشە نازار اۋدارۋ قاجەتتىگىن ايتتى.
«بۇگىن ۇكىمەتتىڭ بيىلعى قورىتىندى وتىرىسىن وتكىزدىك. بارلىق ۇكىمەت مۇشەلەرىن، شاقىرىلعاندار مەن ب ا ق وكىلدەرىن كەلە جاتقان جاڭا جىلمەن قۇتتىقتايمىن! ءبىز 2023 -جىلدى جاقسى ناتيجەلەرمەن شىعارىپ سالعالى وتىرمىز. ءبارىمىز بىرگە ۇيلەسىمدى، اۋقىمدى جۇمىس اتقاردىق. سول ءۇشىن بارشاڭىزعا العىس ايتقىم كەلەدى. كەلەسى جىلعا ايقىندالعان مىندەتتەردى جاقسى بىلەسىزدەر. الدا اتقاراتىن جۇمىس كوپ. سوندىقتان، سىزدەرگە زور دەنساۋلىق، وتباسىلارىڭىزعا باقىت، ەڭبەكتەرىڭىزگە تابىس تىلەيمىز»، - دەدى ءاليحان سمايىلوۆ.
بۇعان دەيىن ۇكىمەتتە 2024 -جىلى قانداي زاڭ جوبالارى ازىرلەنەتىنى تالقىلانعان ەدى.
سونداي-اق، ق ر ادىلەت ءمينيسترى ا. ەسقارايەۆ مەملەكەتتىك ورگانداردىڭ زاڭ جوبالاۋ جۇمىسىن ناشار جوسپارلاعانىن سىنعا الدى.
