گەرمانيادا ءدارى-دارمەك تاپشىلىعى باستالدى
استانا. KAZINFORM - گەرمانيادا ءدارى-دارمەك داعدارىسى ماسەلەسى تۋىندادى - سونىڭ سالدارىنان كەيبىر دارىگەرلەر ناۋقاستاردى ۇيلەرىنە جىبەرۋگە ءماجبۇر، دەپ حابارلايدى BILD.
ءدارى-دارمەك، اسىرەسە ءدارى تامىزعىشقا ارنالعان فيليولوگيالىق ەرىتىندىنى جەتكىزۋدە كۇردەلى داعدارىس تۋىندادى. بۇل تاپشىلىقتان گەرمانيانىڭ ءبىرقاتار مەديتسينالىق مەكەمەلەرىندە دارىگەرلەر ناۋقاستاردى قاجەتتى ەم-دوممەن قامتاماسىز ەتە الماي، ولاردى ۇيلەرىنە جىبەرۋگە ءماجبۇر بولىپ وتىر. بۇل رەتتە مەديتسينا قىزمەتكەرلەرى ءدارى-دارمەك تاپشىلىعى بولۋى مۇمكىن ەكەنىن قىركۇيەك ايىندا ەسكەرتتى.
«بۇكىل گەرمانيانىڭ مەديتسينالىق مەكەمەلەرىندە فيزيولوگيالىق ەرىتىندىنىڭ تاپشىلىعىنا بايلانىستى مەديتسينالىق كومەك كورسەتۋدە شەكتەۋلەر بار. دارىگەرلەر ناۋقاستاردى ەمدەي الماعاندىقتان ۇيلەرىنە جىبەرۋگە ءماجبۇر. بۇل - مەديتسينالىق ساتسىزدىك جانە ەلىمىزدەگى ءدارى-دارمەكپەن قامتاماسىز ەتۋ ءۇشىنشى الەم ەلدەرى دەڭگەيىندە تۇرعانىنىڭ كورىنىسى»، - دەدى فەدەرالدىق دارىگەرلەر قاۋىمداستىعىنىڭ باسشىسى اندرەاس گاسسەن BILD باسىلىمىنا بەرگەن سۇحباتىندا.
ءوز كەزەگىندە نەمىس ەمدەۋ قاۋىمداستىعىنىڭ باسشىسى گەرالد گاسس ماڭىزدى ءدارى- دارمەكتەر مەن ەرىتىندىلەردىڭ تاپشىلىعىنان جەكە كابينەتتەردەگى دارىگەرلەر عانا ەمەس، مەملەكەتتىك اۋرۋحانالار دا زارداپ شەگىپ جاتقانىن اتاپ ءوتتى.
«اۋرۋحانالار وندىرۋشىلەردەن تاپسىرىس بەرەتىن شايۋعا جانە ينفۋزياعا ارنالعان ەرىتىندىلەردىڭ قاجەتتى كولەمىن الماي وتىر. ءبىز ناۋقاستارعا ءالى دە قاجەتتى كومەك كورسەتە الامىز، ءبىراق بۇل ۇلكەن ۇيىمداستىرۋشىلىق جانە قارجىلىق كۇش-جىگەردى قاجەت ەتەدى. الايدا جاعداي تۇزەلمەي، ەمدەلۋشىلەر سانى كوبەيە بەرسە، قىزمەت كورسەتۋ مۇمكىن بولمايدى»، - دەپ قوستى ول.
اۆتور
زارينا تۋعانبايەۆا
