گەرمانيا ميلليون ادامعا ارنالعان بومباپانا دايىنداماق
گەرمانيانىڭ فەدەرالدىق حالىقتى قورعاۋ جانە اپاتتار كەزىندەگى كومەك باسقارماسىنىڭ باسشىسى رالف تيسلەر جاقىندا ەل بيلىگى كوپتەگەن بومبادان قورعايتىن پانا دايىنداۋدى جوسپارلارپ وتىرعانىن ايتتى. بۇل تۋرالى Süddeutsche Zeitung باسىلىمى حابارلايدى.
رالف تيسلەردىڭ ايتۋىنشا، ەۋروپانىڭ ەڭ ءىرى ەكونوميكاسى قاقتىعىستىڭ قاۋپىن ءتۇسىنۋى كەرەك. ال گەرمانيا قازىر بۇعان جەتكىلىكتى دەڭگەيدە دايىن ەمەس. رەسەيدىڭ ۋكرايناعا ۇزاققا سوزىلعان باسقىنشىلىعى ءبىرقاتار ەلدەردە، اتاپ ايتقاندا، بالتىق ەلدەرىندە، پولشادا جانە گەرمانيادا «ماسكەۋ بىرنەشە جىلدان كەيىن ناتو اۋماعىنا شابۋىل جاساۋى مۇمكىن» دەگەن الاڭداۋشىلىق تۋدىردى.
«ۇزاققا سوزىلعان سوعىس - ءبىز دايىندالۋعا ءتيىس سەناري ەمەس» دەگەن پىكىر گەرمانيادا كەڭىنەن تارادى. بۇل وزگەردى. ءبىزدى ەۋروپاداعى كەڭ اۋقىمدى سوعىس قاۋپى قاتتى الاڭداتادى»، - دەدى رالف تيسلەر.
فەدەرالدىق حالىقتى قورعاۋ جانە اپاتتار كەزىندەگى كومەك باسقارماسىنىڭ باسشىسى قورعانىس ينفراقۇرىلىمىن كەڭەيتۋ جانە ەسكەرتۋ جۇيەسىن جاڭارتۋ سياقتى جوبالارعا بايلانىستى ميللياردتاعان يەۆرو شىعىن بولادى دەپ بولجامدى.
«ازاماتتىق قورعانىس سالاسىنداعى مىندەتتەر وتە اۋقىمدى. الداعى ءتورت جىل ىشىندە بىزگە كەم دەگەندە 10 ميلليارد ەۆرو قاجەت بولادى. ال كەلەسى ونجىلدىقتا - كەمىندە 30 ميلليارد ەۆرو. جاڭا جوعارى دەڭگەيدەگى قورعانىس بۋنكەرلەرىن سالۋ كوپ ۋاقىت پەن قاراجاتتى تالاپ ەتەدى»، - دەدى تيسلەر.
جىلدام ءارى مۇمكىندىگىنشە ۇنەمدى شەشىم رەتىندە ول «تۋننەلدەردى، مەتروپوليتەن ستانتسيالارىن، جەر استى اۆتوتۇراقتارىن جانە قوعامدىق عيماراتتاردىڭ جەرتولەلەرىن باسپانالارعا قايتا جابدىقتاۋ» كەرەك دەيدى. وسىلايشا «ءبىر ميلليون ورىندىق باسپانا» دايىنداۋعا بولاتىنىن ايتتى.
جوبا باسپانالاردى بارلىق قاجەتتى زاتتارمەن قامتاماسىز ەتۋدى قاراستىرادى: ازىق-تۇلىك قورىمەن، دارەتحانالارمەن جانە مۇمكىن بولسا توسەك ورىندارىمەن. كىرەبەرىستەر ارنايى بەلگىلەرمەن بەلگىلەنەدى، ال باسپانالار تۋرالى اقپارات موبيلدى قوسىمشالار ارقىلى بەرىلەدى. باسقارما دايىن جوبانى جازدا ۇسىنۋدى جوسپارلاپ وتىر.
Stan.kz
