گەرمانيا اسكەرگە جەدەلدەتىلگەن ساتىپ الۋ تۋرالى زاڭ قابىلداماق
استانا. KAZINFORM - گەرمانيا ناتو ەلدەرىنىڭ اسكەرگە بولەتىن قارجىسىن ىشكى جالپى ءونىمنىڭ 5 پايىزىنا دەيىن جەتكىزۋ تۋرالى ا ق ش- تىڭ باستاماسىنا قولداۋ بىلدىرۋگە دايىن. بۇل تۋرالى ەلدىڭ سىرتقى ىستەر ءمينيسترى يوحانن ۆادەفۋل اليانس مينيسترلەرىنىڭ تۇركيادا كەزدەسۋىندە ايتتى، دەپ حابارلايدى BILD.
جوسپار بويىنشا ىشكى جالپى ءونىمنىڭ 3,5 پايىزى ءداستۇرلى اسكەري شىعىندارعا كەتەدى، ال 1,5 پايىزى اسكەر ينفراقۇرىلىمدى جاڭارتۋعا جۇمسالادى.
كانسلەر فريدريح مەرتستىڭ ەسەبى بويىنشا، بۇل گەرمانيا جىلىنا اسكەرگە 225 ميلليارد ەۋرو ءبولىپ وتىرادى دەگەن ءسوز. ىشكى جالپى ءونىمنىڭ قازىرگى جاعدايىندا بۇل فەدەرالدى بيۋدجەتتىڭ جارتىسىنا جۋىقتايدى.
سوعان قاراماستان كواليتسيالىق كەلىسىمدە تەك قارجى ءبولۋ عانا از ەكەندىگى ايتىلعان. بۋندەسۆەردەگى بيۋروكراتيا سالدارىنان ءىرى ساتىپ الۋلار مەن رەفورمالاردى جۇرگىزۋ قيىن بولىپ وتىر. وسىعان بايلانىستى ۇكىمەت جاقىن ايلاردا «جوسپارلاۋ مەن ساتىپ الۋدى جەدەلدەتۋ تۋرالى» زاڭ قابىلداعالى وتىر.
- ەگەر ساياساتكەرلەر قاجەتتى شارتتاردى قالىپتاستىراتىن بولسا، ونەركاسىپ كەرەكتىنىڭ ءبارىن جەتكىزىپ بەرە الادى، - دەدى Rheinmetall باسشىسى ارمين پاپپەرگەر BILD تىلشىسىمەن اڭگىمە بارىسىندا.
سوعان قاراماستان پروبلەمالار تەرەڭدە جاتىر. گەرمانياعا قازىر كازارمالار، قارۋ-جاراق پەن ادىسكەرلەر جەتىسپەيدى، دەيدى بۋندەسۆەر ىستەرى جونىندەگى وكىل حانس-پەتەر بارتەلس.
- ارينە، وسى ۋاقىتقا دەيىن اسكەردىڭ سانى قىسقارتىلىپ كەلدى، ەندى ولار جەتىسپەي جاتىر، - دەدى ول BILD تىلشىسىمەن ساڭگىمە بارىسىندا.
وسىعان دەيىن گەرمانيا ب ۇ ۇ جەلىسى بويىنشا بوسقىنداردى قابىلداۋدى ۋاقىتشا توقتاتقانى تۋرالى جازدىق.
