گەرمانيا التى ايلىق اسكەري قىزمەتتى ەنگىزۋدى جوسپارلاپ وتىر
استانا. KAZINFORM — گەرمانيا ەلدە ۇلتتىق قورعانىستى كۇشەيتىپ، كوبىرەك رەزەرۆيستەردى دايارلاۋ ماقساتىندا التى ايلىق ەرىكتى اسكەري قىزمەتتى ەنگىزۋدى جوسپارلاپ وتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
Reuters اگەنتتىگىنىڭ حابارلاۋىنشا، ەرىكتىلەر قاراپايىم مىندەتتەردى - مىسالى، كۇزەت قىزمەتىن اتقارۋعا ۇيرەنەدى. الايدا ەرىكتىلەر سانى جەتكىلىكسىز بولسا، ۇكىمەت مىندەتتى اسكەري قىزمەتتى قايتا ەنگىزۋ مۇمكىندىگىن قاراستىرۋى مۇمكىن.
اتاپ وتىلگەندەي، گەرمانيانىڭ قورعانىس ءمينيسترى بوريس پيستوريۋس اسكەر سانىنىڭ قازىرگى 180 مىڭنان 260 مىڭعا دەيىن ارتۋىن قالايدى. دەرەككوزدەردىڭ ايتۋىنشا، ۇكىمەت التى ايلىق ەرىكتى دايىندىق وسى ماقساتقا جەتۋگە كومەكتەسەدى دەپ ۇمىتتەنىپ وتىر جانە ەرىكتىلەردىڭ ءبىر بولىگى اسكەري قىزمەتىن ءارى قاراي جالعاستىرۋى مۇمكىن.
باعدارلاماعا قاتىسۋشىلار ىشكى قاۋىپسىزدىك سالاسى بويىنشا دا قوسىمشا دايىندىقتان وتە الادى - مىسالى، جۇك كولىگى جۇرگىزۋشىسىنىڭ كۋالىگىن الۋ نەمەسە تانك جۇرگىزۋشىسى رەتىندە دايارلىقتان ءوتۋ. سونىمەن قاتار، ساربازدار وقۋىن ءوز ۇيىنە جاقىن جەردە وتكىزە الۋى ءۇشىن جاڭا كازارمالار سالۋ جوسپارلانىپ وتىر.
باسىلىمنىڭ جازۋىنشا، ەگەر ۇكىمەت ەرىكتى قابىلداۋ بويىنشا كوزدەلگەن مەجەگە جەتە الماسا، مىندەتتى قىزمەتكە ناقتى كىمدى شاقىراتىنى ازىرگە بەلگىسىز كۇيىندە قالىپ وتىر. ەسكە سالا كەتەيىك، گەرمانيادا مىندەتتى اسكەري قىزمەت 2011-جىلى توقتاتىلعان.
بۇعان دەيىن حابارلانعانداي، نەمىستەردىڭ 54 پايىزى مىندەتتى اسكەري قىزمەتتى قايتا ەنگىزۋدى قولدايدى.
ايتا كەتەلىك گەرمانيا ۆيزا بەرۋدەن باس تارتۋعا شاعىمدانۋ ءتارتىبىن جوياتىنى تۋرالى جازعان ەدىك.
